Վարչապետը նոր բան չի ասել, այդ մտքերը նա վաղուց է ասել և վերահաստատել է իր նախկին մտքերը և հիմնավորել, որ օրենքի առաջ բոլորը պետք է պատասխան տան: Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր Հովիկ Աղազարյանը՝ անդրադառնալով վարչապետ Նիկոլ Փաշինյանը հայտարարությանը՝ կապված ՊՎԾ պետ Դավիթ Սանասարյանին առաջադրված մեղադրանքին:
«Ախպերական հարաբերությունները կարող են շատ ավելի վտանգավոր լինել, քան օլիգարխիկ դրսևորումները: Դա պայմանավորված չէ նրանով, որ մեր թիմում կան մարդիկ, որ Դավիթ Սանասարյանին պաշտպանում են: Շատերը չեն ուզում հավատալ, որ դա կարող է տեղի ունենալ, այդ անհանգստությունը կա: Չեմ ուզում որևէ կերպ սեպ գցել Դավիթ Սանասարյանի անձի վրա: Ես առավել քան վստահ եմ՝ իրավապահ մարմինները այդ գործընթացը տանելու են օրենքի տառին համապատասխան: Եթե Դավիթ Սաանասարյանը արդարացվի, մի վայրկյան չեմ կասկածի, որ դա հենց այդպես էլ պետք է լիներ»,-ասաց Աղազարյանը:
Իսկ այն պնդմանը՝ «եթե չարդարացվի Դավիթ Սանասարյանի մեղքը, ԱԱԾ պետը պետք է տուն գնա», պատգամավորը նկատեց․«Այստեղ պետք է երևա հատուկ ծառայությունների պրոֆեսիոնալիզմի աստիճանը, եթե չհիմնավորեն, ապա ամենաքիչը ծառայությունը պետք է ինչ-որ գնահատականի արժանանա»:
