Այսօր կառավարությունում հանդիպել են ՀՀ վարչապետ Նիկոլ Փաշինյանը և «Բարգավաճ Հայաստան» կուսակցության նախագահ Գագիկ Ծառուկյանը: «Առաջին լրատվական»-ի հետ զրույցում անդրադառնալով հարցին, թե ինչ նպատակով է կազմակերպված եղել հանդիպումը, ԲՀԿ խմբակցության պատգամավոր Իվետա Տոնոյանը նշեց. «Հանդիպման ընթացքում քննարկվող հարցերի շրջանակը բավականին ընդգրկուն է եղել, մասնավորապես անդրադարձ է կատարվել երկկողմ հետաքրքրություն ներկայացնող հարցերին, նաև տնտեսական բլոկի հարցեր են քննարկվել, բնականաբար զրուցել են նաև «Արարատցեմենտի» շուրջ վերջին շրջանում ստեղծված իրավիճակի մասին: Բացի դրանից՝ խորհրդարան – կառավարություն գործակցության հնարավոր տարբերակների վերաբերյալ հարցեր են քննարկվել: Հանդիպումը, ինչի մասին վկայել է նաև վարչապետի մամուլի խոսնակ Վլադիմիր Կարապետյանը, եղել է կառուցողական, բարեկամական և խիստ արդյունավետ:
Տեղյակ չեմ՝ ում նախաձեռնությամբ է կազմակերպվել հանդիպումը, սակայն օրակարգում ընդգրկված հարցերը հրատապ են եղել, և քննարկման անհրաժեշտություն էր առաջացել: Փաշինյան-Ծառուկյան հանդիպումը հասունացել էր»:
Վերջին օրերին ԲՀԿ ներկայացուցիչների կողմից հնչեցին ակնարկներ, որ թիրախավորվել են Գ. Ծառուկյանի բիզնեսները: Իվետա Տոնոյանը, անդրադառնալով այս դիտարկմանը, նշեց, որ Գ. Ծառուկյանի բիզնեսները պարբերաբար ստուգվել և ստուգվում են. «Այդ ստուգումները այս կամ այն ժամանակահատվածում որոշակի ակտիվությամբ են դրսևորվում՝ միգուցե ինչ-որ գործընթացներով պայմանավորված: Ես օրեր առաջ հանդես եմ եկել հայտարարությամբ, որ հետաքրքիր զուգադիպությամբ «Առինջ մոլում» և «Մուլտի գրուպ» կոնցեռնի կազմում ընդգրկված գազալցակայաններում ստուգումները շատ ակտիվացան այն ժամանակահատվածում, երբ պարոն Ծառուկյանը հանդես եկավ քննադատությամբ՝ կառավարության գործունեության հետ կապված՝ մասնավորապես նշելով, որ կառավարության ներկայացուցիչների 97 տոկոսը կոմպետենտ չէ իր գործառույթների իրականացման հարցում, և դրան հաջորդեցին մեծամասշտաբ ստուգումները: Խոսքն ամենևին ստուգումներ անցկացնելու մասին չէ, այլ անցկացման ձևի: Շուրջ 50 օպերատիվ հետախուզության վարչության սև բաճկոններով աշխատակիցներ հայտնվում են տոնավաճառում աշխատանքի թեժ ժամին և ոչ միայն խաթարում բնականոն աշխատանքային ռեժիմը, այլ նաև բարոյահոգեբանական առումով մթնոլորտում տագնապ ու լարվածություն առաջացնում»:
Մանրամասն՝ տեսանյութում: