Թավշյա հեղափոխությունն իրականություն դառնալու գործում անգնահատելի դեր ունեցավ նաև լրատվական դաշտը, որը կարողացավ վստահելի ինֆորմացիոն աղբյուր դառնալ թե՛ Հայաստանի համար, թե՛ Սփյուռքում ապրող մեր հայրենակիցների համար, որպեսզի մատը զարկերակի վրա պահեն: Ինչպիսի՞ն է այսօր՝ զարգացումներից մեկ տարի անց հայկական լրատավական դաշտը. «Առաջին լրատվական»-ի հետ զրույցում, անդրադառնալով այս հարցին, լրագրող, դասախոս Մարկ Գրիգորյանը նշեց. «Վերջին տարիներին իրադարձությունները հեռարձակվում են ուղիղ եթերում… Շատ կարևոր է ոչ միայն մամուլի, այլ նաև սոցիալական ցանցերի դերը, այն, ինչ չենք կարող տեսնել մամուլում, տեսնում ենք սոցիալական ցանցերում: Մամուլը պետք է կարողանա իր ճիշտ տեղը գտնել նոր իրողություններում և կարողանա մրցակցել սոցիալական ցանցերի հետ»:
Մ. Գրիգորյանը նկատեց, որ որոշ լրատվամիջոցներ ուղիղ եթերով ցույց են տալիս կատարվող իրադարձությունը՝ առանց մեկնաբանության, այսինքն՝ աշխատում են նույն մակարդակով, ինչ-որ սոցցանցերի օգտատերերը. «Ես դա համարում եմ լրագրության թերացումը: Լրատվամիջոցը պետք է կարողանա ոչ միայն ցույց տալ, այլ նաև մեկնաբանել, թե ինչ է տեղի ունենում:
Ոմանք կարդում են պրոիշխանական մամուլը, ոմանք ընդդիմադիր, մենք ընտրում ենք մամուլի միջոցը՝ ելնելով այն մեկնաբանություններից, որոնք ներկայացնում է տվյալ լրատվամիջոցը: Փաստերը շատ թե քիչ ներկայացնում են գրեթե բոլորը, բայց բոլորը չէ, որ կարողանում են մեկնաբանել տեղի ունեցածը»:
Մեր զրուցակիցը կարևորեց նաև լրատվամիջոցի անաչառ լինելը. «Լրագրության անաչառության համար կան միջոցներ, հիմնական միջոցը բալանսը պահելն է՝ պետք է լսել և ներկայացնել տարբեր կողմերի կարծիքները»: Նա նաև ընդգծեց, որ լրագրությունը չպետք է դառնա քաղաքական հոսանքների մաս:
Մանրամասն՝ տեսանյութում: