Առանց մեղադրական դատավճռի հանցավոր ճանապարհով ստացված գույքի բռնագանձման վերաբերյալ նախաձեռնությունը քաղաքական լուրջ շահարկումների թեմա էր դարձել առ ժամանակ առաջ։ Այս ինստիտուտի ներդրման համար, վարչապետ Նիկոլ Փաշինյանի որոշմամբ, աշխատանքային խումբ է ձևավորվել համապատասխան օրենքների փաթեթ ներկայացնելու նպատակով։ Այս օրենսդրական կարգավորումը գործում է մի շարք զարգացած երկրներում, և դատելով այդ երկրներում տիրող իրավիճակից, կարծես թե, բավականին արդյունավետ է գործում։ Ինչո՞ւմն է խնդիրը «Առաջին լրատվական»-ի հարցին փաստաբան Տիգրան Հայրապետյանը պատասխանեց․ «Ճիշտն ասած՝ ծանոթ չեմ ընթացող գործընթացներին, միայն մամուլի հրապարակումներից հետևյալն եմ կարողացել հասկանալ, որ ինչ-որ օրենք պետք է ընդունվի, որտեղ պետք է դրվի քաղաքացու գույքի օրինականության հարցը։ Եթե քաղաքացին չի կարողանում հաստատել, որ գույքը ձեռք է բերել օրինական ճանապարհներով, ապա կարող է այդ գույքը կամ դրա մի մասը բռնագանձվել։ Այս առումով միջազգային փորձից տեղյակ չեմ»։
Իսկ ԵՊՀ սահմանադրական իրավունքի ամբիոնի վարիչ, սահմանադրագետ Վարդան Այվազյանն էլ ասաց․ «Ես ողջունում եմ այս նախաձեռնությունը, բայց ընդունելով այն, ըստ իս, մենք Սահմանադրության հետ խնդիր ենք ունենալու, քանի որ սահմանադրորեն մենք ունենք մի դրույթ՝ անմեղության կանխավարկածը, որտեղ մեղավորության ապացուցման պարտականությունը դրվում է պետության վրա։ Այսինքն՝ նման օրենսդրական խնդրին լուծում տալու համար անհրաժեշտ է համալիր մոտեցում։ Կարծում եմ՝ պետք է համալիր փոփոխություններ կատարել նաև Սահմանադրության մեջ»։
Մանրամասները՝ տեսանյութում։
