Մենք տեղեկացրել ենք, որ այսօր Սոչիում պետք է տեղի ունենար Ռուսաստան-ՆԱՏՕ խորհրդի նիստ, որին մասնակցելու էին ՆԱՏՕ-ի գլխավոր քարտուղար Անդերս Ֆոգ Ռասմուսենը և Ռուսաստանի նախագահ Դմիտրի Մեդվեդևը: Կայացած հանդիպումից հետո Ռասմուսենն ասել է, որ ՆԱՏՕ-ն մերժել է Ռուսաստանի պահանջները Լիբիայի հարցով՝ հայտնելով, որ ՆԱՏՕ-ն գործում է ՄԱԿ-ի ԱԽ բանաձևին համապատասխան և դուրս չի եկել նրա կողմից տված լիազորություններից:
«Մեր մանդատն ակնհայտ է, մենք գործում ենք ՄԱԿ-ի ԱԽ 1973 բանաձևի համաձայն, որը թույլ է տալիս օգտագործել բոլոր հնարավոր ուժերը և միջոցները՝ քաղաքացիական բնակչության վրա հարձակման վտանգը կանխելու համար»,- ասել է Ռասմուսենը: Այս մասին հաղորդում է Interfax գործակալությունը: Ռուսաստանը մինչ այս հանդիպումը մեղադրում էր ՆԱՏՕ-ին ՄԱԿ-ի ԱԽ բանաձևը խախտելու մեջ և այդ հարցը հավանաբար այսօր էլ է բարձրացվել:
Ռասմուսենն անդրադարձել է նաև հակահրթիռային պաշտպանության համատեղ համակարգի հարցին, որի խոսքերից կարելի էր կռահել, որ առաջընթաց չի գրանցվել. «Ես հույս ունեմ, որ մենք կհանդիպենք մեկ տարի հետո Չիկագոյում կայանալիք ՆԱՏՕ-ի գագաթնաժողովին և կարող ենք համաձայնել ՀՀՊ հարցի շուրջ»,- ասել է Ռասմուսենը: «Մենք հեռու ենք գնացել՝ Լիսաբոնից մինչև Սոչի: Դա երկար ճանապարհ էր, և մենք շատ գործ ենք արել, որպեսզի խոսքերը կյանքի կոչենք»,- հավելել է նա:
