Հայաստանում ԵՄ պատվիրակության, ՀՀ արտաքին գործերի նախարարության և ԵՄ խորհրդարանական խմբի համատեղ ջանքերով այսօր լրատվական միջոցների և քաղաքացիական հասարակության համար կազմակերպվել էր հանրային իրազեկման միջոցառում ԵՄ-Հայաստան Վիզաների դյուրացման համաձայնագրի վերաբերյալ:
ՀՀ արտաքին գործերի նախարարի տեղակալ Սերգեյ Մանասարյանը ԵՄ-ին ներկայացրեց Հայաստանի ակնկալիքները Վիզաների դյուրացման և Ռեադմիսիայի համաձայնագրերից:
ԵՄ-Հայաստան Վիզաների դյուրացման համաձայնագիրը ենթադրում է պարզեցված ընթացակարգեր կարճաժամկետ մուտքի այցագրերի տրամադրման համար, այսինքն՝ այն դեպքում, երբ որևէ Շենգենյան երկիր այցի տևողությունը չի գերազանցում 90 օրը 180 օր ժամանակահատվածում:
«Համաձայնագրի ընդունման նպատակն է նպաստել միջմարդկային շփումների ակտիվացմանը, Հայաստանի և Եվրամիության միջև մշակութային, գիտական, տնտեսական և այլ կապերի զարգացմանը: Մեր քաղաքացիների միջև կապերը խթանելու նպատակով Հայաստան ուղևորվելիս ազատվում են վիզայի պահանջներից, այս իրավիճակը տարածվում է նաև մի շարք երկրների վրա, որոնք ԵՄ անդամ չեն:
Մոտ ապագայում նախատեսում ենք սկսել Եվրամիության հետ նոր բանակցություններ՝ շենգենյան վիզայից ազատելու համար»,- ասաց Սերգեյ Մանասարյանը:
Նրա խոսքով՝ վիզաների դյուրացման համար նախատեսվում են դյուրացված ընթացակարգեր, պարզեցվում է ճամփորդության նպատակը, և համաձայնագրի հիմնական առավելությունն այն է, որ մի շարք խմբերի համար այն անվճար է տրամադրվում:
«Մենք նաև մեծ կարևորություն ենք տալիս համաձայնագրի բարեխիղճ կիրառմանը: Հարկ է հիշատակել, որ անհրաժեշտ փաստաթղթերից բացի՝ պետք են նաև լրացուցիչ փաստաթղթեր, ինչպիսիք են, օրինակ, կեցության ֆինանսական միջոցների համար անհրաժեշտ տեղեկությունները:
Նախատեսում ենք նաև Հայաստանի և Եվրամիության միջև համաձայնագրերի ստորագրման կապակցությամբ համապատասխան փորձագետների մասնակցությունը»,- ընդգծեց Սերգեյ Մանասարյանը:
Ինչ վերաբերում է ռեադմիսիայի համաձայնագրին, որը մենք ամբողջովին անվանում ենք ԵՄ-ի և Հայաստանի միջև հետընդունման մասին համաձայնագիր, ապա Մանասարյանը նշեց, որ այն կոչված է կանոնակարգելու այն անձանց վերադարձը, որոնց՝ ԵՄ անդամ տարածքում գործելու, բնակվելու պահանջները չեն բավարարվում. «Համաձայնագրով դյուրացվում է այդպիսի անձանց հետընդունումը Հայաստան»:
Ի դեպ, արտոնյալ կատեգորիաների անձինք անվճար վիզա կարող են ստանալ միայն այն դեպքում, եթե ողևորությունը հստակ կապված է տվյալ երկրում որևէ աշխատանք իրականացնելու հետ:
Ինչ վերաբերում է լրագրողների ելումուտին ԵՄ անդամ որևէ երկիր, ապա եթե նրանք ներկայացնեն իրենց աշխատավայրից անհրաժեշտ փաստաթուղթ այն մասին, որ իրենք գնում են աշխատելու և ոչ՝ հանգստանալու, ապա, իհարկե, նրանց համար կգործի վիզային ռեժմի դյուրացված տարբերակը:
ՀՀ քաղաքացիների համար նոր կանոններից բխող օգուտները հետևյալն են. վիզաների տրամադրման մասին որոշումների կայացման ընթացակարգն ավելի արագ է, որոշումը կայացվում է վիզայի համար պահանջվող ընդունելի դիմումի և հիմնավորող փաստաթղթերի ստացման ամսաթվից տասն օրվա ընթացքում: Այս ժամկետը, սակայն, կարող է հետաձգվել մինչև երեսուն օր՝ լրացուցիչ ուսումնասիրության անհրաժեշտության դեպքում:
Բացի այդ՝ վիզաների վճարը Հայաստանի բոլոր քաղաքացիների համար ավելի ցածր է՝ 35 եվրո՝ 60 եվրոյաի փոխարեն, իսկ որոշ խմբերի համար, ինչպես արդեն նշվեց՝ անվճար: Դիմումի գործընթացն էլ ավելի հեշտ է քաղաքացիների մի շարք խմբերի համար, ովքեր պետք է ներկայացնեն իրենց ճանապարհորդության նպատակը հիմնավորող ավելի քիչ փաստաթղթեր:
