Ռեժիսոր Բրայան Սինգերի «Բոհեմական ռապսոդիա» ֆիլմը երաժշտության աշխարհի ամենահասութաբեր կենսագրական նախագիծն է դարձել կինեմատոգրաֆի պատմության մեջ: Կինոնկարը, որը պատմում է Queen խմբի և նրա վոկալիստ Ֆրեդի Մերկուրիի (1946-1991 թթ.) փառքին հասնելու ճանապարհի մասին, համաշխարհային վարձույթում հավաքել է ընդհանուր առմամբ 900 մլն դոլար, այդ թվում ՝ Մեծ Բրիտանիայում՝ 71 մլն դոլար: Այդ մասին հայտնել է հեռուստառադիոհաղորդումների BBC բրիտանական կորպորացիան:
Ժապավենը, որի բյուջեն կազմել է մոտավորապես 50 մլն դոլար, հիթ է դարձել Ճապոնիայում, որտեղ դրամամուտքերը հասել են 144 մլն դոլարի: Ինչպես BBC-ին հայտարարել է ֆիլմերի վարձույթի հարցերով փորձագետ Չառլզ Հանթը, նման հաջողությունը «ֆենոմենալ արդյունք» է «Բոհեմական ռապսոդիայի» վարձույթում: Այնուամենայնիվ, նա ձեռնպահ է մնացել այն կանխատեսումներից, որ ֆիլմի դրամամուտքերը կհաղթահարեն 1 մլրդ դոլարի նշագիծը: Ֆիլմն արդեն դուրս է եկել բոլոր առաջատար կինոշուկաների մեծ էկրաններ, այդ թվում՝ Չինաստանում, որտեղ այն գրաքննության են ենթարկել:
«Բոհեմական ռապսոդիան» չորս ոսկե արձանիկ է ստացել Ամերիկյան կինոարվեստների ակադեմիայի պարգևների հանձնման 91-րդ արարողությանը: Մասնավորապես, Ռամի Մալեքը, ով Ֆրեդի Մերկուրիի դերակատարն է, «Օսկար»-ի է արժանացել «Լավագույն դերասան» անվանակարգում։
