ՀՀ ազգային ժողովն այսօր առաջին ընթերցմամբ ընդունվեց «Տոների և հիշատակի օրերի մասին» օրենքում լրացում կատարելու մասին նախագիծը՝ 92 կողմ, 3 դեմ և 5 ձեռնպահ ձայներով: 103 կողմ ձայնով առաջին ընթերցմամբ ընդունվեց նաև Հարկային օրենսգրքում փոփոխություններ կատարելու մասին օրենքի նախագիծը: Պատգամավորներն այսօրվա նիստում անդրադարձան նաև օրեր առաջ տրանսգենդերի մուտքին ԱԺ և նրա ելույթին խորհրդարանում:
«Առաջին լրատվական»-ի հետ վերնոշյալ թեմաների շուրջ քննարկմանը մասնակցեցին «Լուսավոր Հայաստան» խմբակցության պատգամավոր Հարություն Բաբայանը, ԲՀԿ խմբակցության պատգամավոր Գևորգ Պետրոսյանը, «Իմ քայլը» խմբակցության պատգամավոր Վահագն Հովակիմյանը:
ՀՀ քաղաքացու օր նշելուն ԲՀԿ-ն կողմ է քվեարկել, ԲՀԿ պատգամավոր Գ. Պետրոսյանը, սակայն, նշեց, որ քաղաքացին պետք է ապրի այնպիսի երկրում, որ տարվա 365 օրն էլ համարի իր օրը. «Մենք սկզբունքորեն կողմ չենք, բայց վաղն էլ կողմ կքվեարկենք, որպեսզի տպավորություն չստեղծվի, թե մենք դեմ ենք կառավարության նախաձեռնությանը քաղաքացու մի օր իրեն երջանիկ համարելու վերաբերյալ»:
Հ. Բաբայանի խոսքով՝ «Լուսավոր Հայաստան»-ի դիտարկմամբ՝ պետք է ոչ թե այսօր որոշում կայացվեր տոնի վերաբերյալ, այլ ժամանակի փորձություն պետք է լիներ, և ժողովուրդը արժևորելով՝ ընտրեր տոնի խորհուրդը:
Վ. Հովակիմյանի խոսքով՝ տոնը միտված է ապագային: Նրա դիտարկմամբ՝ Քաղաքացու օրը քաղաքացու հաղթանակի տոնն է:
Անդրադառնալով ԱԺ-ում տրանսգենդեր կնոջ հայտնվելուն և ելույթ ունենալուն, Գ. Պետրոսյանն ընդգծեց. «ԲՀԿ-ն եղել է և մնալու է ավանդական արժեհամակարգի պաշտպանի դերում, այստեղ զիջում չենք կարող թույլ տալ, սա մեր երկրի անվտանգության, մեր պետության ամրության խնդիրն է, և պետք է հաշվի նստել բոլոր չարիքների դեմ: Գալ և ԱԺ-ն օգտագործել սեփական հարցեր լուծելու համար, այն էլ ոչ օրակարգայի՞ն: Ն. Զոհրաբյանը կոռեկտությունը պահեց՝ բարձր պահելով իր կոչումը: Ես լինեի, կընդհատեի»:
«Այս թեմայով քննարկումը ծավալելով՝ մեր հանրությանը շատ վատ ծառայություն ենք մատուցում և սպասարկում ԼԳՏԲ շահերը,- նշեց Վ. Հովակիմյանը՝ հավելելով նաև, որ տրանսգենդերի ելույթի ժամանակ ԱԺ-ում «Իմ քայլը» խմբակցության ընդամենը երկու պատգամավոր է ներկա եղել և նրա ելույթից հետո ծափահարողներն իրենք չեն եղել:
Հ. Բաբայանի խոսքով՝ հասարակության համար ԱԺ-ն սուրբ տեղ է, և հասկանալի է այսօր կազմակերպված հասարակական ընդվզումը ԱԺ ամբիոնից տրանսգենդերի ելույթ ունենալու դեմ:
Մանրամասն՝ տեսանյութում:
