ԱՄՆ Պետքարտուղարության և Պաշտպանության նախարարության մի քանի պաշտոնատար անձինք ԱՄՆ նախագահ Դոնալդ Թրամփին մեղադրում են, որ նա չի կարողացել Թուրքիայի հետ բանակցությունների ժամանակ ավելի կոշտ վերջնագիր ներկայացնել, որոնցից հետո Անկարային մերժել են ամերիկյան F-35 կործանիչների վաճառքը։ Այս մասին հայտնում է ABC News հեռուստաալիքը՝ վկայակոչելով աղբյուրներին:
Ռուսական C-400 զենիթահրթիռային համալիրի գնումից Անկարայի հրաժարվելու գլխավոր հույսը դրված էր Թուրքիայի նախագահ Ռեջեփ Թայիփ Էրդողանի հետ Թրամփի հեռախոսային բանակցությունների վրա, որոնք տեղի են ունեցել փետրվարին: Երեք աղբյուրների խոսքով՝ Էրդողանը հետ է մղել Թրամփի կողմից պատժամիջոցներ սահմանելու սպառնալիքները: Իսկ ամերիկացի առաջնորդի պատասխանը բավականաչափ կոշտ չի հնչել, որպեսզի «Էրդողանը հասկանար, թե ինչ է վտանգում»։ Հիմա Անկարան ավելի է առաջ ընթանում C-400 ԶՀՀ-ն գնելու մտադրության ճանապարհին։
Հեռուստաալիքի տեղեկություններով՝ 2 առաջնորդների զրույցից առաջ Պետքարտուղարության և Պենտագոնի պաշտոնյաները մեծ ջանքեր են ներդրել, որ ԱՄՆ նախագահին պատրաստեն զրույցին և հնարավոր հետևանքներին: Աղբյուրի խոսքով՝ այս պատմության մեջ Թրամփի դերը բացառիկ կարևոր էր, քանի որ Էրդողանը հակված չէ լսելու ԱՄՆ ցածր կարգավիճակով պաշտոնյաներին: Քանի որ թուրք առաջնորդն անձամբ էր վարել գործարքի շուրջ բանակցությունները, հույս կար, որ Թրամփի կողմից ճնշումը կօգնի հրաժարվել ռուսական C-400-ները գնելու գաղափարից:
Սպիտակ տունը չի պատասխանել ABC News-ի՝ մեկնաբանություն տալու հարցմանը:
Պենտագոնն ապրիլին դադարեցրել էր Թուրքիա F-35-ի մատակարարումները: Վաշինգտոնում մտավախություն ունեն, որ ՆԱՏՕ-ի անդամի կողմից ամերիկյան կործանիչների եւ ռուսական Ս-400-ի միաժամանակյա գնումը կշրջվի նրանով, որ Ռուսաստանը կկարողանա հասանելիություն ստանալ գաղտնի տեխնոլոգիաներին: