Լուրեր
Հարկային նոր օրենսգրքի նախագիծը կատարյալ չէ. Պետք է ունենանք այնպիսին, որը 5-6 տարի չենք փոխի
  • 10:30
  • 2019-04-06
  • Դիտումներ՝ *

«Շատ կարևոր է, որ կառավարությունը բիզնես հանրության, տարբեր ճյուղերի հետ քննարկումների, երկխոսության փուլում ցուցաբերեց ճկունություն»,- «Առաջին լրատվական»-ի հետ զրույցում ասաց Հայաստանի արդյունաբերողների և գործարարների միության նախագահ Արսեն Ղազարյանը՝ անդրադառնալով գազավորված խմիչքների մասով Հարկային նոր օրենսգրքի նախագծում ակցիզային հարկի վերանայման խնդրին։

Ղազարյանի խոսքով՝ ակցիզավորելով գազավորված խմիչքները՝ ուղղակի հարված է հասցվելու արտադրական ծավալներին, սպառման ծավալներին և սպառողների գնողունակությանը։ Այս ամենի արդյունքում մուլտիպլիկատիվ էֆեկտով ծավալները կնվազեին։

Բացի այդ, Ղազարյանի խոսքով, հարևան երկրների փորձը նույնպես հուշում էր, որ այդ քայլը սխալ կլիներ։ «Բայց հարցը դեռ օրակարգում է և հետագայում կունենանք ինչ-որ միջանկյալ լուծում, որը կբավարարի բոլորին»,- ասաց Ղազարյանը։

Նրա կարծիքով՝ Հարկային այս օրենսգրքի նախագիծը, որը քննարկվում է արդեն 3-4 տարի, պետք է շուտափույթ ընդունվի. «Այս երկար քննարկումներից հետո արդեն պահն է, որ օրենսգիրքը ընդունվի, և ընդունման երկրորդ օրվանից սկսվեն աշխատանքները այն կատարելագործելու ուղղությամբ։ Այս Հարկային օրենսգրքին մենք շատ երկար ենք սպասել։ Այսօր ունենք դրույթներ, որոնց տնտեսությունը սպասում է՝ թե՛ եկամտահարկի համահարթեցումը, թե՛ միկրոբիզնեսին հարկերից ազատումը, թե՛ 150 միլիոն շրջհարկի սահմանագիծը բարձրացնելը և այլն։ Տնտեսության կարգավորման համար պետք է լինի օրենսդրություն, Հարկային օրենսգիրք, որը կնպաստի տնտեսական զարգացումներին։ Ասել, թե այս օրենսգիրքը կատարյալ է, սխալ կլինի։ Դա հասկանում է նաև կառավարությունը, և շարունակական բարեփոխումները կբերեն դրական արդյունքի։ Այս բոլոր քննարկումների արդյունքում պետք է ունենանք Հարկային օրենսգիրք, որը 5-6 տարի չենք փոխի»,- ընդգծեց Ղազարյանը։

Առավել մանրամասն՝ տեսանյութում:

  • Դիտումներ՝ *