ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանն ապրիլի 3-ին ընդունել է Հայաստանի Հանրապետությունում Վրաստանի արտակարգ և լիազոր դեսպան Գիորգի Սագանելիձեին:
Քննարկվել են հայ-վրացական խորհրդարանական օրակարգի առաջմղմանն առնչվող հարցեր: Կողմերը կարևորել են երկու երկրների միջեւ ձեւավորված ավանդական բարեկամական կապերի առավել ընդլայնումն ու խորացումը, ընդգծել խորհրդարանական դիվանագիտության դերը միջպետական հարաբերություններում:
Անդրադարձ է կատարվել հեղափոխությունից հետո մեր երկրում ժողովրդավարական ինստիտուտների զարգացման համար ստեղծված նպաստավոր պայմաններին: Զրուցակիցներն ընդգծել են խորհրդարանական կառավարման պայմաններում օրենսդիր մարմնի առանցքային դերակատարությունն ինչպես պետականաշինության, այնպես էլ խորհրդարանական վերահսկողության իրականացման հարցում:
Հանձնաժողովի նախագահը եւ դեսպանը, անդրադառնալով տարածաշրջանային խնդիրներին ու մարտահրավերներին, համակարծիք են եղել հակամարտությունների բացառապես խաղաղ կարգավորման հարցում: Նրանք ընդգծել են, որ խաղաղությունն ու անվտանգության ապահովումը տարածաշրջանի զարգացման կարեւոր գրավականն են:
Նույն օրը Հայաստանում Վրաստանի արտակարգ եւ լիազոր դեսպան Գիորգի Սագանելիձեին ընդունել է նաեւ ՀՀ ԱԺ արտաքին հարաբերությունների մշտական հանձնաժողովի նախագահ Ռուբեն Ռուբինյանը:
Ողջունելով հյուրին՝ ՀՀ Ազգային ժողովում՝ Ռուբեն Ռուբինյանը կարևորել է հայ-վրացական միջպետական հարաբերությունների զարգացմանն ուղղված արդյունավետ խորհրդարանական համագործակցությունը: Այս համատեքստում հանձնաժողովի նախագահն ընդգծել է Հայաստանի եւ Վրաստանի խորհրդարանների միջեւ երկխոսության բարձր մակարդակի ապահովման առաջնահերթությունը՝ որպես փոխշահավետ գործակցության հետագա ընդլայնման եւ խորացման ամուր հիմք:
Կողմերն անդրադարձել են նաեւ միջազգային հարթակներում համագործակցության հարցերին, քննարկել երկու երկրների բազմոլորտ հարաբերությունների խորացմանը եւ ընդլայնմանը վերաբերող հարցեր:
