«Ֆրանսիայի արտգործնախարարի հայտարարությունը հասկանալի էր և սպասելի, քանզի արդեն բազմաթիվ անգամ, մինչև Կազանի հանդիպումը, ՄԽ ֆրանսիացի համանախագահողը հայտարարել է, որ եթե Կազանում համաձայնություն չլինի, կփոխեն հայեցակարգը: Այսինքն՝ նրանք արդեն նախապես տրամադրված էին ինչ-որ նոր առաջարկներ անելու՝ հույս չունենալով, որ Կազանում համաձայնություն կլինի»,- «Առաջին լրատվականի» հետ զրույցում անդրադառնալով Ֆրանսիայի արտգործնախարարի հայտարարությանը՝ կարծիք հայտնեց Ռազմավարական և ազգային հետազոտությունների հայկական կենտրոնի տնօրեն Մանվել Սարգսյանը:
Հիշեցնենք, որ Մոսկվա կատարած այցի ժամանակ Ֆրանսիայի արտաքին գործերի նախարար Ալեն Ժյուպեն ասել էր, որ ղարաբաղյան հակամարտության կողմերին «լրացուցիչ առաջարկներ» կներկայացվեն:
Սարգսյանը նշեց, թե դեռևս հստակ չէ, թե այդ նոր առաջարկներով միջնորդները մեղմացնում են դիրքերը հօգուտ Ադրբեջանի՞, թե՞ հակառակը: Սակայն, ըստ ՌԱՀՀԿ տնօրենի, Ադրբեջանի առաջարկներին տեղի տալու դեպքում էլ Հայաստանը չի ընդունի դրանք, և նորից իրավիճակը առաջ չի գնա:
