Հնդկաստանից և Վիետնամից հետո Ադրբեջանը երրորդ իսրայելական զենքի գնորդն է, գրում է «Նեզավիսիմայա գազետա» պարբերականը։ Հոդվածում խոսվում է նաև Իսրայել-Ադրբեջան ռազմատեխնիկական համագործակցության և երկրների հարաբերությունների սերտացման, ինչպես նաև դրան Հայաստանի արձագանքի մասին։
Մասնավորապես ընդգծվում է վերջին տարիներին Իսրայելի՝ Ադրբեջանին զենքի վաճառելու մասին։ Խոսքը վերաբերում է «Բարակ-8» զենիթահրթիռային համալիրներին, «CARDOM» ինքնագնաց ականանետներին, ինչպես նաև EL/M-2080 «Գրին Փայն» հակահրթիռային ռադիոտեղորոշման ու «Երկաթե գմբեթ» հակահրթիռային պաշտպանության համակարգերին:
Ըստ իսրայելցի հոդվածագիր, քիմիական և փիլիսոփայական գիտությունների դոկտոր Զահար Գելմանի՝ չնայած որ ռազմական և ռազմատեխնիկական ոլորտում Ադրբեջան-Իսրայել հարաբերությունները որպես գործակցային են որակավորվում, իսկ համագործակցության մակարդակը շատ բարձր է, երկու երկրների հարաբերությունները դաշնակցային անվանել չի կարելի։
Նշվում է, որ Իսրայելի և Ադրբեջանի միջև ռազմատեխնիկական համագործակցությունը Հայաստանի համար որոշակի վտանգ է ներկայացնում, սակայն Իսրայելի պաշտոնական իշխանություները շարունակում են հայտարարել, թե իրենց զենքն ուղղված չէ Հայաստանի դեմ:
Բացի այդ, Իսրայելը վախենում է Հայաստանում Իրանի ազդեցության ուժեղացումից։ Չնայած Երևանի և Թեհրանի միջև ռազմական ոլորտում լուրջ համագործակցության բացակայությանը՝ Երուսաղեմն ուշադիր հետևում է իրավիճակին:
Հոդվածի հեղինակն ուշադրություն է հրավիրում նաև փաստին, որ Ադրբեջանն Իսրայելում դեռևս դիվանագիտական առաքելություն չունի, իսկ Հայաստանում վերջին շրջանում հայտարարում են հրեական պետությունում դեսպանության բացման մտադրությունների մասին: