Կազանի եռակողմ հանդիպումից հետո ռուսական մամուլում եղավ տեղեկատվություն, թե ՌԴ նախագահ Դ.Մեդվեդևը հիասթափվել է բանակցություններից և այլևս չի մասնակցելու եռակողմ ֆորմատի հանդիպումներին: Սակայն երեկ Կիևում` իր ուկրաինացի պաշտոնակից Վիկտոր Յանուկովիչի հետ համատեղ ասուլիսում Սերժ Սարգսյան հայտնել է, որ Ռուսաստանի նախագահ Դմիտրի Մեդվեդևը Հայաստանի և Ադրբեջանի նախագահներին ուղերձ է հղել ԼՂ կարգավորման գործընթացի վերաբերյալ:
Քաղաքագետ Հրանտ Մելիք-Շահնազարյանը «Առաջին լրատվականի» հետ զրույցում նկատեց, որ Մեդվեդևի հիասթափության մասին լուրերը առաջին անգամ հրապարակել է «Կոմերսանտ» թերթը, ինչն ամենևին էլ փաստ չէ, որ թերթն այդ լուրը անմիջապես Կրեմլից է ստացել. «Կարծում եմ՝ նույնիսկ այդպիսի բան չի եղել, այլ դա պարզապես Ռուսաստանի քաղաքական ընդդիմության քայլն է՝ Մեդվեդևի քաղաքականության ոչ արդյունավետությունը ցույց տալու համար»:
Քաղաքագետի գնահատմամբ՝ իր ուղերձով Մեդվեդևը հերքում է այդ լուրերը և հակամարտության կարգավորման իր տեսլականը ներկայացնելով ցույց տալիս, որ ինքը շարունակում է առաջին ջութակի դերը խաղալ բանակցային գործընթացում, ինչը, Մելիք-Շահնազարյանի կարծիքով, ձեռնտու է թե՛ կողմերին, թե՛ միջնորդներին:
Մելիք-Շահնազարյանը նշեց, որ եվրոպացի շատ փորձագետներ իրենց դիրքորոշմամբ ցույց են տալիս, որ Արևմուտքում ոչ ոք իրականում չի ուզում ամբողջությամբ թաթախվել այդ գործընթացի մեջ, և բոլորը գոհ են Ռուսաստանի գործունեությամբ` կարևոր չէ նա հաջողության հասնում է, թե ոչ. «Այստեղ ավելի գլոբալ խնդիր է պատերազմի վերսկսման կանխումը, և քանի դեռ այդ խնդիրը լուծվում է, բոլորը բավարարված են իրենց զգում»: