Ադրբեջանի քաղբանտարկյալների մոնիթորինգի կենտրոնի համակարգող Օքթայ Գյուլալիևը հրապարակել է Տերտերի զինվորական դատարանի 2019-ի հունվարի 31-ի (098)-7/2019 դատավճիռը, փոխանցում է Turan գործակալությունը։
Դա վկայում է հայերի հետ համագործակցության մեջ մեղադրվող մի քանի զինվորականների կտտանքների և սպանության մասին։ Տվյալ անձինք ձերբակալվել են 2017-ի մայիսին և մահացել կալանքի ժամանակ։ Ութ զոհերից չորսը հետագայում արդարացվել է, իսկ նրանց կտտանքների ենթարկողները՝ ձերբակալվել, սակայն ոչ բանտարկյալների սպանության համար։
«Ինչպե՞ս կարող է ստացվել, որ դատապարտյալների առանձնակի դաժանությամբ սպանություն կատարածները դատապարտվում են 6 տարվա ազատազրկման, ընդ որում՝ ոչ սպանության հոդվածով։ Իսկ այդ ընթացքում քաղբանտարկյալների ընտանիքներին նյութական օգնություն ցուցաբերող Սալեհ Ռուստամովը ստացել է 7 տարի 3 ամիս բանտարկություն, իսկ զինվորների մահվան դեմ բողոքող Իլքին Ռուստամզադեն՝ 8 տարի ազատազրկում»,- ասել է Գյուլալիևը։
