Ադրբեջանական Salam News գործակալության փոխանցմամբ՝ Թուրքիայի Ազգային մեծ ժողովի (ԹԱՄԺ) քուրդ պատգամավոր Հասիփ Քափլանը, մեկնաբանելով Հաթիփ Դիջելի կապակցությամբ ԹԱՄԺ-ում քուրդ նորընտիր պատգամավորների՝ երդման արարողությունից հրաժարվելուն, սպառնացել է թուրքական իշխանություններին.
«Եթե իշխանությունները չլուծեն քրդերի հարցը, ապա վերջիններիս մոտ այնպիսի տպավորություն կառաջանա, որ Անկարայում գործող խորհրդարանն այլևս չի հանդիսանա երկրի օրենսդիր մարմինը։
Եթե մեր ժողովուրդն այդպիսի եզրահանգման գա, ապա Էրդողանի կառավարությունը չի կարող գոյատևել 6 ամսից ավելի։ Հենց այդ ժամանակ էլ ժողովրդի մոտ կառաջանա օրինական ապստամբման իրավունք»։
Հիշեցնենք, որ քուրդ նորընտիր պատգամավորներն ու գլխավոր ընդդիմադիր «Ժողովրդա-հանրապետական» կուսակցությունը (ԺՀԿ) բոյկոտել էին ԹԱՄԺ-ի առաջին նիստը, ինչի արդյունքում Թուրքիայի խորհրդարանի պատմության ընթացքում առաջին անգամ 550 հոգանոց ԹԱՄԺ-ում երդման արարողությունն անցել էր առանց 189 պատգամավորի մասնակցության։
