Ժայռամագլցորդ Ալեն Ռոբերը, որ հայտնի է «սարդ-մարդ» մականունով, կրկին մագլցել է Engie ընկերության 185 մետր բարձրությամբ աշտարակը Փարիզի La Défense բիզնես-թաղամասում: Այս մասին հաղորդում է Agence France-Presse- ը:
Ինչպես նախորդ անգամները, այս անգամ էլ Ռոբերը իր ակցիան նվիրել է որոշակի նպատակի։ «Նոր վերելքը նվիրված է Փարիզի Աստվածամոր տաճարի փրկությանը։ Ֆրանսիայի այդ ժառանգությունը փլուզման եզրին է»,- ասել է Ռոբերը։ Նա հավելել է, որ կոթողի վերականգնման համար անհրաժեշտ է 150 մլն եվրո։
Վերելքը գրավել է մի քանի տասնյակ անցորդների ուշադրությունը, տևել է 45 րոպե և անցել առանց միջադեպերի։
Հիշեցնենք, որ Ալեն Ռոբերն այժմ 56 տարեկան է․ նա իր ձեռքբերումների շնորհիվ հայտնվել է Գինեսի ռեկորդերի գրքում։ Նա աշխարհի տարբեր ծայրերում բազմաթիվ երկնաքերներ է մագլցել։
