Ինչպես հայտնի է, կառավարությունը հավանություն է տվել «Տոների և հիշատակի օրերի մասին» Հայաստանի Հանրապետության օրենքում լրացում կատարելու մասին» Հայաստանի Հանրապետության օրենքի նախագծին, որով ամրագրվում է Հայաստանի Հանրապետության քաղաքացու օրը. այն կնշվի ապրիլի վերջին շաբաթ օրը: Թեման քննարկելու համար «Առաջին լրատվական»-ը հյուրընկալել է Գերագույն խորհրդի պատգամավոր Ազատ Արշակյանին և քաղաքագետ Արմեն Հովհաննիսյանին:
Դիտարկմանը՝ այս օրը նշելը անհրաժեշտ է իշխանությա՞նը, թե՞ հասարակությանը, Արմեն Հովհաննիսյանը պատասխանեց. «Ես ո՛չ առաջին, ո՛չ երկրորդ դեպքում՝ ո՛չ իշխանության, ո՛չ հասարակության համար անհրաժեշտություն չեմ տեսնում: Բայց դա ամենևին չի նշանակում, որ դա վատ բան է: Քաղաքացիականությունը որպես երևույթ, այո՛, պետք է մեր մեջ զարգանա, պետք է խրախուսվի»:
Նա, սակայն, հարց է բարձրացնում, թե ինչ ասել է քաղաքացիականություն. «Արդյոք քաղաքացիականությունը գիտակից կյանքի ընթացքում երեք օր փողոց դուրս գա՞լն է, թե՞ ամեն օր որպես քաղաքացի ապրելն ու աշխատելը: Եթե այսպիսի գիտակցում լինի, ինչու ոչ՝ կարող է լինել և մի տրամաբանական օր, իսկ այդ օրը որոշակի տրամաբանության հետ է կապված: Սակայն իմ կարծիքով՝ անհրաժեշտությունը մի քիչ չափազանցված կատեգորիա է՝ կարող էինք առանց դրա էլ ապրել»:
Ազատ Արշակյանի կարծիքով՝ այդպիսի օր ունենալը անհրաժեշտ է. «Կարող եմ ասել՝ հպատակությունից անցում: Բոլոր մեր տոները ազգային-ազատագրական են եղել, բայց քաղաքացիությունը բովանդակություն չունի: Ես կուզենայի, որ սա լիներ քաղաքացիության ուղերձ: Մեր իշխանությունը այսպես է արձանագրում իր հաղթանակը, ինչը լավ է, և դրանով մենք տարբերվում ենք ասիացիներից. նրանք Նուրսուլթանը դարձրին մայրաքաղաք»:
Ազատ Արշակյանի խոսքով՝ այս իշխանությունն ուզում է մնալ պատմության մեջ, բայց ուզում է մնալ այսպես՝ քաղաքացիության ինստիտուտը կարևորելով:
Հարցազրույցն ամբողջությամբ՝ տեսանյութում:
