Քաղաքական սատիրան վերջին շրջանում մեծ լսարան և պահանջարկ ունի ամբողջ աշխարհում: «Առաջին լրատվական»-ի հետ զրույցում անդրադառնալով հարցին, թե ինչով է պայմանավորված այդ ժանրի մասսայականությունը և արձագանքը դրան՝ դերասան Սերգեյ Դանիելյանն ընդգծեց, որ քաղաքական սատիրան բավականին հզոր զենք է, եթե ճիշտ է կիրառվում: «Քաղաքական գործիչները նյարդայնանում են, որ իրենց մի քիչ ձեռք են առնում, բայց դա շատ լավ, շատ առողջ բան է: Եվ լավ է, որ դրանից վատ են զգում: Ինչքան փորփրեն, դատի տան, դրանից ավելի լավ կլինի:
Քաղաքական սատիրան իր արգասիքներն, իր օգուտը բերում է, ինչքան էլ ծիծաղեն, հետո սկսում են մտածել: Սատիրան միշտ մի քիչ ավելի առաջ է գնում, քան հասարակության կարծիքն է: Երբ որ հեղափոխությունից 2 օր հետո մտա եթեր՝ պարոն Փաշինյանին նմանակելով, մեծ արձագանք եղավ: Իսկ հիմա հանգիստ պարոդիա են անում»:
«Նախկինում ուրիշ էր, խոսում էինք մարդասպանությունից, գողությունից, կեղտոտ գործարքներից, հիմա զուտ հումոր է,- նշեց դերասանը: – Հիմա ինձ զսպում է սպասումը, կուզեի խոսել «թայֆաբազությունից», բայց սպասում եմ, որ ամեն ինչ իր տեղն ընկնի: Դեռ շուտ է ասել իշխանությունն էֆեկտիվ է, թե ոչ, դրա համար ժամանակ է պետք, հիմա ինչ-որ հարցերով էֆեկտիվ է, ինչ-որ հարցերով դեռ կաղում է, ես սպասում եմ:
Իդեալական տարբերակ չկա, երջանիկ կամ դժբախտ զգալը մարդուց է, բայց իշխանությունը պետք է տեսլական ունենա ու մեզ էլ բացատրի: ժողովուրդն ուզում է լավ ապրել, այդքան բան: Եվ իդեալական տարբերակն այն է, որ հին, մնացորդային ընդդիմություն կոչվածը ընդհանրապես հանվի դաշտից, ուզում են բանտ նստեցնեն, ուզում են աքսորեն, բայց պրծնենք նրանցից ու նոր կյանք սկսենք: Ամեն մի գող ու բոսյակ, երեկվա մարդասպան ասում է՝ ընդդիմություն եմ: Ես կոշտ մոտեցում կցուցաբերեի… Մարդը տրուսիկով Ղարաբաղից եկել, միլիարդատեր է դարձել, դատարանները դեռ մտածում են՝ դատել թե չդատել, ոնց դատել: Ակնհայտ գողին բռնել են, գլուխ են հարթուկում: Ես ռադիկալ քայլերի եմ սպասում»:
Մանրամասն՝ տեսանյութում:
