Առանց մեղադրական դատավճռի գույքի բռնագրավման նպատակով ներդրվող ինստիտուտի և ստեղծվող աշխատանքային խմբի, ինչպես նաև անցումային արդարադատության որոշ գործիքների մասին զրուցելու համար «Առաջին լրատվական»-ը հյուրընկալել է «Քաղաքացու որոշում» սոցիալ-դեմոկրատական կուսակցության գործադիր մարմնի քարտուղար Սուրեն Սահակյանին, «Իմ քայլը» խմբակցության պատգամավոր Նիկոլայ Բաղդասարյանին և «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանին:
Դիտարկմանը, թե ինչու են մտահոգվում նախկին իշխանությունների ներկայացացուցիչները՝ վախենում են, որ հերթը իրե՞նց էլ կհասնի, Դավիթ Իոաննիսյանն արձագանքեց. «Իհարկե մտահոգված են, որովհետև հասկանում են, որ բազմաթիվ կոռուպցիոն հանցագործություններ հենց իրենց կամ իրենց հարազատներին կարող են վերաբերել: Հեռու չգնանք՝ Սերժ Սարգսյանի եղբայրը…»:
Նա մանրամասնեց՝ այս օրինագիծը քննադատողների կուսակցական ղեկավարի եղբայրը՝ Լևոն Սարգսյանը, այդ կարգավիճակում է և հետախուզման մեջ է. «Իհարկե, իրենք մտահոգված են, իրենց տեղը լինեի՝ ես էլ մտահոգված կլինեի»:
Նիկոլայ Բաղդասարյանը, սակայն, հստակեցրեց, թե ինչ ինստիտուտի մասին է խոսքը, և ասաց. «Տարբեր քաղաքական ուժերի կողմից հնչեցված մտահոգությունները գոյություն չունեն»: Նրա խոսքով՝ Ազգային ժողովից դուրս չի գա օրենք, որը կարող է ենթադրաբար գոնե մեկ անձի իրավունքները խախտել. «Մենք շատ զգոն ենք այդ հարցերում. այդ օրենքները մինչև չանցնեն համապատասխան փորձաքննություն, Ազգային ժողովը երբևիցե չի ընդունի»:
Ինչպես նշեց Սուրեն Սահակյանը, անցումային արդարադատության՝ ակտիվների վերադարձի հատվածի վերաբերյալ իրենք առաջարկում են համերաշխության մոդել. «Սեփականությունը մնում է իրենց մոտ, բայց դրա արժեքը փոխհատուցվում է: Ընդ որում՝ մենք առաջարկում ենք, որ այդ վերադարձված միջոցները գնան այնտեղ, որտեղից գողացվել են: Եվ դա է այն կոնսենսուսը, որի դեպքում հանրությունը համաձայնելու է ներել և հաշտվել»:
Հարցազրույցն ամբողջությամբ՝ տեսանյութում:
