«Հայաստանի պատմության մեջ չի եղել դեպք, որ նախաքննության մարմինը՝ մեղադրանքի մարմինը, բացարկ հայտնի դատավորին: Մեր իշխանության ժամանակ դա տեղի է ունեցել»,- ԱԺ պետաիրավական հարցերով մշտական հանձնաժողովի նիստի ժամանակ հայտարարեց արդարադատության նախարար Արտակ Զեյնալյանը և հավելեց, որ սա վկայում է այն մասին, որ դատավորն ու դատախազը դադարել են լինել մի կողմում:
Նախարարի խոսքով՝ այժմ շատացել են կալանքը խափանման այլ միջոցով՝ գրավով փոխարինելու դեպքերը, պակասել են կալանքը որպես խափանման միջոց ընտրելու միջնորդություները. «Սրանք ցուցանիշներ են, որոնք ամբողջ համակարգի մեջ չեն երևում, սակայն լավ կլիներ, որ հետազոտություն արվեր՝ պարզելու համար հանրային վստահության դինամիկան»:
Արտակ Զեյնալյանը նաև կարծում է, որ այսքան շատ հայցերը դատարաններում վկայում են այն մասին, որ մարդկանց մեջ հույս է արթնացել, որ դատական պաշտպանության իրավունքով միջոցով կարելի է հասնել խնդրի լուծման:
Ինչ վերաբերում է անցումային արդարադատությանը, Արտակ Զեյնալյանը ընդգծեց՝ այն չի լինելու հաշվեհարդարի գործիք, չի լինելու վրեժխնդրության գործիք, այլ կոչված է լինելու մարդու իրավունքների վերականգնմանը:
Առավել մանրամասն՝ տեսանյութում:
