Ֆուտբոլի Հայաստանի Բարձրագույն խմբի առաջնության 23-րդ տուրում «Արարատ-Արմենիան» հյուրընկալվելիս 1:0 հաշվով առավելության հասնելով գործող չեմպիոն «Ալաշկերտի» նկատմամբ՝ գլխավորեց մրցաշարային աղյուսակը: Այս պահին «Արարատ-Արմենիան» ունի 38, իսկ երկրորդ տեղում գտնվող «Փյունիկը»՝ 36 միավոր: Նույնքան միավոր ունի նաև «Ալաշկերտը», վերջինս, սակայն, ի տարբերություն «Փյունիկի», մեկ հանդիպում քիչ է անցկացրել:
Առաջնության երկրորդ հատվածում «Արարատ-Արմենիան» ցույց է տալիս բոլորովին նոր որակի ֆուտբոլ՝ դառնալով չեմպիոնի կոչման գլխավոր հավակնորդներից մեկը, եթե ոչ՝ գլխավորը: Հիշեցնենք, որ «Արարատ-Արմենիայի» սեփականատերը ռուսաստանաբնակ հայտնի գործարար Սամվել Կարապետյանն է, իսկ թիմի գլխավոր մարզիչը՝ Վարդան Մինասյանը: Վերջինս անցյալ տարի հրաժարվելով Հայաստանի ազգային հավաքականի գլխավոր մարզչի պաշտոնից՝ աշխատանքի անցավ երևանյան ակումբում:
Մեր մյուս ակումբների համեմատ «Արարատ-Արմենիան» շատ ավելի գրագետ և արդյունավետ տրանսֆերային քաղաքականություն է վարում՝ մոբիլիզացնելով բարձրակարգ ֆուտբոլիստների: Այս գործընթացը տվեց իր պտուղները հատկապես այն բանից հետո, երբ գլխավոր մարզիչ նշանակվեց Վարդան Մինասյանը: Վերջինս ձմեռային դադարի ընթացքում ձևավորեց թիմի կորիզը, որի շուրջ կառուցվում է խաղը: Անցյալ տարի երկրպագուները մեծ անհամբերությամբ էին սպասում Մոսկվայի «Արարատի» և մասնավորապես Սամվել Կարապետյանի մուտքին հայկական ֆուտբոլ: Հիշեցնենք, որ «Արարատը» հաղթող էր ճանաչվել Ռուսաստանի՝ իր նշանակությամբ երրորդ դիվիզիոնում, որից հետո Կարապետյանը ակումբը տեղափոխեց Երևան՝ վերանվանելով «Արարատ-Արմենիա»: Խոսվում էր, որ «Արարատ-Արմենիան» հզոր մի նախագիծ է, որը միտված է լինելու ակումբային ֆուտբոլում մեր երկիրը ավելի հայտնի ու ճանաչելու դարձնելուն: Ավելի ստույգ՝ շատերը, աչքի տակ ունենալով ադրբեջանական «Ղարաբաղի» օրինակը, սպասում են, որ մի օր էլ մենք ներկայացուցիչ կունենանք Չեմպիոնների լիգայի կամ Եվրոպա լիգայի խաղարկության խմբային փուլում:
Առաջնության սկզբնամասում, սակայն, «Արարատ-Արմենիան», որը բավական ուժեղ կազմ ուներ, սպասվածից խիստ անհաջող էր ելույթ ունենում: Ակումբի ղեկավարությունը ստիպված եղավ աշխատանքից ազատել գլխավոր մարզիչ Վադիմ Սկրիպչենկոյին: Մինասյանի նշանակումից հետո պարզ դարձավ, որ «Արարատ-Արմենիան» լուրջ հավակնությունններ ունի: Վերջին յոթ հանդիպումներում թիմը նույնքան հաղթանակ է տարել: Վերջին անգամ երևանյան թիմը պարտվել է 2018 թվականի նոյեմբերի 11-ին՝ նվազագույն հաշվով զիջելով Գյումրիի «Շիրակին»:
Փաստորեն, առաջին անգամ մասնակցելով Հայաստանի առաջնությանը, «Արարատ-Արմենիան» մոտ է չեմպիոն դառնալուն, ինչը կարելի է բացառիկ երևույթ համարել: Երևույթը միևնույն ժամանակ դրական է մի քանի տեսանկյուններից: Առաջին հերթին՝ շնորհիվ «Արարատ-Արմենիայի» մեծացել են մրցակցությունն ու հետաքրքրությունը: Ավելին՝ բարձրացել է նաև խաղերի որակը: Եթե անցյալ տարի ոմանք հիասթափված էին «Արարատ-Արմենիայի» մրցելույթներից, ապա այսօր վստահաբար կարող ենք ասել, որ ակումբի ռուսաստանաբնակ սեփականատերը ձեռնոց է նետել մյուս ակումբների սեփականատերերին: Կարապետյանը մոտ է առաջին փորձերից հայկական ֆուտբոլի բարձունքը նվաճելուն: Մյուս ակումբներին ոչինչ չի մնա անել, քան ավելացնել ներդրումները «Արարատ-Արմենիայի» հետ հավասար պայքար մղելու համար:
Ըստ «Տրանսֆերմարկետ» պարբերականի՝ «Արարատ-Արմենիայի» ֆուտբոլիստների տրանսֆերային ընդհանուր արժեքը մոտ 6 միլիոն եվրո է, ինչը կարելի է բավական բարձր ցուցանիշ համարել: Այս հարթության մեջ Կարապետյանի թիմին մոտ են «Փյունիկն» ու «Ալաշկերտը», որոնց ֆուտբոլիստների ընդհանուր արժեքը 5.1 միլիոն եվրո է: Մրցաշարային աղյուսակն ուսումնասիրելով՝ ստանում ենք բավական հետաքրքիր պատկեր: Վերին հատվածում այն ակումբներն են, որոնց ֆուտբոլիստների տրանսֆերային արժեքն ամենաբարձրն է: Ուզենք թե չուզենք ֆինանսական բալանսը հաջողության հասնելու հիմնական գրավականն է: Այսինքն՝ հավաքագրելով ավելի ուժեղ ֆուտբոլիստների՝ կարճ ժամանակահատվածում հնարավոր է արդյունքի հասնել:
Ինչ խոսք, կարևոր է նաև գլխավոր մարզչի դերը: Վերջին տարիներին հայկական ակումբային ֆուտբոլում դոմինանտը «Ալաշկերտն» էր, որը դրսից ֆուտբոլիստներ հրավիրելուց բացի՝ հավաքագրում էր նաև տեղացի բարձրակարգ խաղացողներին: Անցյալ տարվանից հետո առաջին պլանում հայտնվեցին նաև «Փյունիկն» ու «Արարատ-Արմենիան», որոնք ունեն ֆինանսական լուրջ ռեսուրսներ և հստակ քայլեր են կատարում ավելի ուժեղ և պրոֆեսիոնալ դառնալու համար:
Այս պահին ունենք բոլորովին այլ իրավիճակ: Դոմինանտը դառնում է «Արարատ-Արմենիան», և հիմա պետք է սպասենք, թե ինչ քայլեր կձեռնարկեն լուրջ հավակնություններ ունեցող մյուս ակումբները, մասնավորապես՝ «Փյունիկը», «Ալաշկերտը», ինչու չէ՝ նաև «Բանանցը» և «Լոռին»:
