«Հայաստանում տարիներ ի վեր այնպիսի դիսկուրսներ են ձևավորվել, որ կարծես տերմինաբանական շփոթի առարկա է դարձել, թե ինչ է «խաղաղությունը» և ինչ է «պատերազմը», և ընդհանրապես՝ խոսել պատերազմի և խաղաղության մասին չի նշանակում ունենալ այդ դիսկուրսները. պետք է հասկանալ՝ ինչ տարրեր ունեն այդ դիսկուրսները, և առկա՞ են արդյոք դրանք հասարակությունում, թե՞ ոչ»,- «Առաջին լրատվական»-ի հետ զրույցում նշեց սոցիոլոգ, Միջազգային և անվտանգության հարցերի հայկական ինստիտուտի ասոցացված փորձագետ Սյուզաննա Բարսեղյանը:
Նրա խոսքով՝ հիմա խաղաղության դիսկուրսը փորձում է գտնել լուծման տարբերակներ, տրանսֆորմացնել կոնֆլիկտը՝ ի տարբերություն պատերազմի դիսկուրսի, որը մրցակցության մեջ է մտնում և խնդրի լուծման միակ տարբերակը համարում է պատերազմը. «Պատերազմի դիսկուրսը բևեռականացնում է կոնֆլիկտը, իսկ խաղաղության դիսկուրսը փորձում է համակողմանի նայել խնդրին»:
Փորձագետի կարծիքով՝ այս դիսկուրսների վրա իրենց ազդեցությունն են թողնում քաղաքական, հանրային դիսկուրսները և մեդիա դաշտը. «Այդ դիսկուրսները մեծապես ազդում են որոշումների կայացման, իրական քաղաքականության վրա»:
Այս համատեքստում Սյուզաննա Բարսեղյանը շատ կարևոր է համարում վարչապետ Նիկոլ Փաշինյանի՝ երկու երկրների ժողովուրդներին խաղաղության նախապատրաստելու ուղերձը. «Այս տարիների ընթացքում երևի նման ուղերձ չի եղել: Եթե մենք ուզում ենք լուծել Արցախյան խնդիրը, ապա պետք է հնարավորություն տանք խոսելու խաղաղության մասին: Մենք այս կողմից էլ կարող ենք ինչ-որ ձևով ազդել հակառակ կողմի հասարակության պատկերացումների ձևավորման վրա»:
Հարցազրույցն ամբողջությամբ՝ տեսանյութում: