«Ինձ համար միակ խնդրահարույցը, թերևս, գյուղատնտեսության նախարարության միացումն է էկոնոմիկայի նախարարությանը, իսկ մնացած առումներով կառավարության կառուցվածքային փոփոխություններն ինձ բավարարում են, որովհետև ես գիտեմ՝ ինչ տրամաբանություն է դրված դրանցում»,- «Առաջին լրատվական»-ի հետ զրույցում ասաց ԱԺ «Իմ քայլը» խմբակցության պատգամավոր, տնտեսական հարցերով հանձնաժողովի անդամ Հայկ Գևորգյանը:
Ինչպես նշեց մեր զրուցակիցը՝ 21-րդ դարում, սակայն, գյուղատնտեսությունը չի դիտվում որպես հողագործություն կամ անասնապահություն, այլ դիտվում է որպես բարձրտեխնոլոգիական արտադրական ճյուղ, ուստի այս տեսանկյունից այդ նախարարության միացումը էկոնոմիկային ևս տրամաբանական է: Նրա խոսքով՝ օպտիմալացման արդյունքում կունենանք կառավարման ավելի պարզ, ավելի ընկալելի մեխանիզմներ:
Հարցին՝ որքա՞ն գումար կտնտեսվի օպտիմալացման արդյունքում, որքա՞ն մարդ կկրճատվի, Հայկ Գևորգյանը պատասխանեց. «Կրճատումների այն թվերը, որոնք հնչում են, իհարկե չեն լինելու. ամբողջ կառավարման համակարգը ընդամենը 18 հազար մարդ է, իսկ հնչում է 10 հազար հոգու կրճատման մասին: Չկա հաշվարկի նման բանաձև, թե քանի մարդ և որքան ժամկետում կկրճատվի. ամեն ինչ պետք է լինի էմպիրիկ»:
Այնուամենայնիվ մեր զրուցակիցը ներկայացրեց նախնական հաշվարկ, ըստ որի՝ առաջին փուլում այդ 18 հազարից կարող է կրճատվել 100-200 մարդ. «Դրանք լանցետով գործողություններ չեն, այլ բնական ընթացք կունենան»:
Հարցազրույցն ամբողջությամբ՝ տեսանյութում: