Բարձրագույն դատական խորհրդի նախագահը մարտի 13-ին ընդունել է ԵԽԽՎ մշտադիտարկման հանձնաժողովի Հայաստանի հարցերով զեկուցողներ Յուլիա Լյովոչկինային, Անդրեյ Շիրցելին, ԵԽԽՎ մշտադիտարկման հանձնաժողովի քարտուղար Ալեքսիս Սալանսոնին և Հայաստանում Եվրոպայի խորհրդի (ԵԽ) գրասենյակի ղեկավար Նատալյա Վուտովային:
Ինչպես տեղեկացրին Բարձրագույն դատական խորհրդի մամուլի և հասարակայնության հետ կապերի ծառայությունից, հանդիպման ընթացքում քննարկվել են դատական իշխանության համակարգում համալիր բարեփոխումների հայեցակարգային մոտեցումները, Խորհրդի կողմից նախանշված արդյունավետ արդարադատության երաշխավորման ռազմավարական գերակա ուղղությունները:
Համազեկուցողները կարևորել են Հայաստանում անկախ, անաչառ, մատչելի ու արդյունավետ արդարադատության կայացման ուղղությամբ ձեռնարկվող համալիր մոտեցումները:
Նույն օրը Խորհրդի նախագահն ընդունել է դատաիրավական բարեփոխումների գծով Եվրախորհրդի փորձագետներին: Հանդիպման ընթացքում, մասնավորապես, կարևորվել են արդարադատության մշտադիտարկման համակարգի և էլեկտրոնային արդարադատության ներդրման, դատավորների ու դատարանների աշխատակազմերի վերապատրաստման արդյունավետության բարձրացմանն ուղղված քայլերը:
