Երեկվա հանրահավաքին Լևոն Տեր-Պետրոսյանը, դիմելով իշխանություններին, մաղթեց, որ ողջախոհությունը գոնե այս անգամ չդավաճանի վարչախմբի պարագլուխներին, և առաջիկա մեկ-երկու ամսում նրանք վերջնականապես կողմնորոշվեն արտահերթ ընտրություններ անցկացնելու հարցում։ Հակառակ դեպքում ողջամիտ կոչված ժամկետը սեպտեմբերին սպառված կհամարվի, և իրենց օրակարգում կմնա ընդամենը մեկ պահանջ, այն է՝ Սերժ Սարգսյանի և իշխող կոալիցիայի անվերապահ հրաժարականը։ Այնինչ, իշխանությունները շարունակում են համառել, որ արտահերթ ընտրությունների անհրաժեշտություն չկա։
Զրուցեցինք ԱԺ ՀՀԿ-ական պատգամավոր Լեռնիկ Ալեքսանյանի հետ՝ հասկանալու համար, թե հնարավոր է, որ սեպտեմբերին իրավիճակը վերահսկողությունից դուրս գա:
Նա ասաց, թե որոշակի սրացումներ կանխատեսում է՝ կապված ընտրությունների հետ: Նախընտրական տարի է, հետևաբար բնական է համարում, որ յուրաքանչյուր քաղաքական ուժ պետք է իր սրությամբ համակիրների թիվն ավելացնի և այլն: «Ոչ միայն ՀԱԿ-ն է փորձելու սլաքը ուղղել իշխանությունների վրա»,- ավելացրեց Լեռնիկ Ալեքսանյանը:
Ինչ վերաբերում է հարցին՝ վերջին հանրահավաքից հետո երկխոսության ճանապարհին մենք մի քայլ առա՞ջ գնացինք, թե՞ ետ, Լեռնիկ Ալեքսանյանը պատասխանեց. «Մենք հետ չենք գնացել: Հարաբերությունները հետ չեն գնացել: Երկխոսությունը շարունակվելու է, բայց ավելի շատ շարունակվի հրապարակայնորեն: Բնականաբար, կլինեն նաև որոշակի սրացումներ և իշխանություններին ուղղված քննադատություններ: Ինչը ես շատ բանական եմ համարում ընտրություններից առաջ»: