«Ֆաթհ» կուսակցության արտաքին կապերի պատասխանատու Նաբիլ Շաաթը վերջերս Հայաստան կատարած այցի ժամանակ հայտարարել էր, թե ակնկալում է, որ Հայաստանը լինելու է առաջին 24 պետություններից մեկը, որը ճանաչելու է Պաղեստինի անկախությունը։ Եթե իսկապես Հայաստանը ճանաչի Պաղեստինի անկախություը, դա ինչպե՞ս կանդրադառնա Երուսաղեմի Սուրբ Հակոբյանց միաբանության, վանքապատկան կալվածքների և առհասարակ հայկական համայնքի իրավիճակի վրա։ Այս թեմայի շուրջ «Առաջին լրատվականը» զրուցեց Երուսաղեմի պատրիարքության միաբան Արիս արքեպիսկոպոս Շիրվանյանի հետ։
Ըստ նրա՝ Պաղեստինի անկախության հարցի լուծումը շատ կարևոր է տեղի հայկական համայնքի համար։ «Մեր միաբանությանը Պաղեստինի անկախությունը ուղղակի առումով չի առնչվում, սակայն եթե Պաղեստինի ակախությունը ճանաչվի, մենք կիմանանք՝ ինչ պետք է լինի մեր ճակատագիրը։ Երուսաղեմի հին քաղաքը պաղեստինցիք որպես մայրաքաղաք պահանջում են։ Այն Պաղեստինի մաս կկազմի, թե ոչ՝ շատ կարևոր է մեզ համար»,- ասում է Երուսաղեմի պատրիարքության միաբան Արիս արքեպիսկոպոս Շիրվանյանը և հիշեցնում, որ Երուսաղեմի Սուրբ Հակոբյանց միաբանությունը գտնվում է հենց այդ պատմական տարածքում։
«Ինչ վերաբերում է Հայաստանի ճանաչել կամ չճանաչելուն Պաղեստինի անկախությունը, ապա դա բացառապես հայկական կառավարության խնդիրն է և չի կարող որևէ անդրադարձ ունենալ համայնքի կյանքի վրա»,- ասում է Արիս արքեպիսկոպոս Շիրվանյանը։