Լուրեր
Պետք է հիմա միջազգային հանրության կարծիքի վրա ազդենք․ Էդմոն Մարուքյան
  • 18:30
  • 2019-03-12
  • Դիտումներ՝ *

Այսօր Արցախում ՀՀ վարչապետ Նիկոլ Փաշինյանի և Արցախի Հանրապետության նախագահ Բակո Սահակյանի համանախագահությամբ կայացել է Հայաստանի և Արցախի Անվտանգության խորհուրդների համատեղ նիստ: Իր ելույթում Նիկոլ Փաշինյանը նշել է․ «Գլխավոր հարցը հետևյալն է՝ իսկ բանակցային գործընթացում ո՞վ է ներկայացնում Արցախի ժողովրդին կամ, ինչպես որոշ դեպքերում ասվում է, Ղարաբաղի հայությանը: Խնդիրն այն է, որ բանակցային գործընթացում այսօր Արցախի ժողովրդին ներկայացնելու լիազորություն, լեգիտիմություն ունեցող որևէ ներկայացուցիչ չկա, որովհետև բանակցային սեղանի շուրջ ներկա չէ Արցախի ժողովրդի կամ, ինչպես մեր որոշ գործընկերներ գերադասում են ասել, Ղարաբաղի հայության քվեն, լիազորությունն ստացած որևէ սուբյեկտ»։

Անդրադառնալով Նիկոլ Փաշինյանի ելույթին՝ ԱԺ ԼՀԿ խմբակցության ղեկավար Էդմոն Մարուքյանը «Առաջին լրատվական»-ի հետ զրույցում նշեց, որ ԼՀԿ-ն գտնում է, որ ԼՂ ներկայացուցիչը պետք է անպայման վերադառնա բանակցությունների սեղան։

«Նոր իշխանության ձևավորումից հետո հայտարարել ենք, որ աջակցում ենք իշխանությունների այդ մոտեցումը։ Նաև սիմվոլիկ իմաստով շատ կարևոր ուղերձ է Արցախում Անվտանգության խորհրդի նիստ գումարելը, բացի այդ՝ այն հայտարարությունը, որ Հայաստանը շարունակելու է պնդել և հիմնավորել ԼՂ լեգիտիմ ներկայացուցչի մասնակցության հարցը բանակցային ֆորմատում։ Ըստ էության՝ սա այն է, ինչ ասվել է, և այդ գիծը հետևողականորեն պահվում է, և մենք էլ հետևողականորեն աջակցելու ենք այս մասով»,-հավելեց Էդմոն Մարուքյանը։

  • Դիտումներ՝ *