Պետական կառավարման համակարգից կրճատումների 10 հազար թիվը պայմանական է, և ֆինանսների նախարարը նշում է, որ եթե նույնիսկ 10 հազար հավելյալ արժեք չստեղծող չինովնիկներ ազատվեն աշխատանքից, ապա դա կլինի ի շահ Հայաստանի: Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր Հայկ Գևորգյանը՝ հավելելով, որ Ատոմ Ջանջուղազյանի այդ խոսքում ոչ մի տարօրինակ բան չկա:
«Եթե «հավելյալ արժեք չստեղծող» արտահայտությունը փորձենք փոխակերպել ազատ լեքսիկոնի, կլինի այսպես՝ եթե նույնիսկ 10 հազար շարիկ գլորող չինովնիկներ ազատվեն աշխատանքից, դրանից կշահի Հայաստանի Հանրապետությունը: Դա ակնհայտ է, որովհետև երբ դուք աշխատում և հարկեր եք վճարում, մենք այդ հարկերից վերցնում և տալիս ենք հավելյալ արժեք չստեղծող չինովնիկին, որոնք մնում են պետական կառավարման համակարգում: Մենք գիտենք, որ այսօրմիջին պաշտոնյայի ծանրաբեռնվածությունը ցածր է, այց թե դա ինչքան է, ոչ ոք այս պահին չի կարող ասել: Կկրճատվի հազարը, 5 հազարը, թե 10 հազարը, այսօր ոչ ոք ասել չի կարող»,-նշեց Հայկ Գևորգյանը:
Նա հիշեցրեց, որ վարչապետն էլ է հայտարարել, որ այդ կրճատումները տեղի են ունենալու էվոլյուցիոն ճանապարհով. «Չես վերցնում և մեխանիկորեն, եթե ասենք 1000 մարդ է աշխատում, ավտոմատ դրանցից 500-ն ազատվեն: Չի կարող այդպես լինել, կարող է ընդահնարպես չազատվեն, կարող է նույնիսկ նոր աշխատողի կարիք լինի»:
