Կանանց ու տղամարդկանց հավասար ներգրավվածությունը հասարակական կյանքին նախապայման է որակյալ պետություն ունենալու, արդարության և ժողովրդավարության համար: Այս մտքի հեղինակը ԱԺ «Լուսավոր Հայաստան» խմբակցության անդամ, ԱԺ ֆինանսավարկային և բյուջետային հանձնաժողովի նախագահ Մանե Թանդիլյանն է: «Առաջին լրատվական»- ի հետ զրույցում նա նշեց, որ, ցավոք, դեռևս շատ հեռու ենք այս իրականությունից. «Այս տեսակ մոտեցումների կրողը գիտակից, բանիմաց, հեռատես, կիրթ տղամարդիկ են, ովքեր հասկանում են, որ այս ռեսուրսը չի կարելի վատնել, որ կանանց ներգրավվածությունը քաղաքական, հասարակական դաշտում տնտեսական շատ ավելի արդյունք է տալիս, և որ սա է ժողովրդավարության և հավասար հնարավորությունների իրացման նախապայմանը, որտեղ ծաղկում են պետությունները»:
Մ. Թանդիլյանի կարծիքով՝ Հայաստանում կա պոտենցիալը, որ ԱԺ-ում կարող են լինել հավասար թվով կանայք և տղամարդիկ, քանի որ կիրթ, զարգացած, խելացի կանանց թիվը շատ մեծ է, ովքեր դեռևս քաղաքական դաշտում չեն:
ԱԺ պատգամավորի դիտարկմամբ՝ կանանց և տղամարդկանց իրավունքները թղթի վրա են հավասար: Անդրադառնալով հարցին, թե ինչու են Հայաստանում կանայք ավելի ցածր վարձատրվում՝ Մ. Թանդիլյանը նշեց, որ ամբողջ աշխարհում է այդպես, և պատճառներից մեկն այն է, որ կանանց ամբիցիաները, այդ թվում նաև ֆինանսական, ավելի հեշտ է բավարարել: Հմտությունն ու գիտելիքը նույնն են, բայց առնչվում ենք խտրականության հետ, երբ կնոջն ավելի ցածր աշախավարձ է առաջարկվում, քան տղամարդուն»:
Անդրադառնալով հրապարակմանն այն մասին, որ Հայաստանում կանանց նկատմամբ բռնությունների թիվն աճել է, Մ. Թանդիլյանն ընդգծեց. «Մենք պետք է ամբողջ հասարակությունով մերժենք բռնությունը»:
Թե ապօրինի հարստացածների նկատմամբ ինչպիսի օրենքի կիրառումը ճիշտ կլինի, ըստ Մ. Թանդիլյանի, պետք է առնվազն այնպիսի հիմանվորումներ լինեն, որ հետադարձություն չլինի. «Այն, ինչ տեղի է ունենում Հայաստանում, պետք է լինի իրավաբանորեն հիմնավորված, նաև պետք է լինեն մեխանիզմներ, որոնք պետք է կանխարգելեն ապօրինի հարստացման հնարավորությունները մեր երկրում, պետք է լինեն համակարգային լուծումներ: Ի՞նչ է նշանակում նվեր տալ ապօրինի հարստությունը, թալանածը վերադարձնելը նվիրատվություն կոչելը տեղին չէ»:
Մանրամասն՝ տեսանյութում:
