Արևմտյան լրատվամիջոցներն այսօր տեղեկություն են տարածել այն մասին, որ Microsoft ընկերության ղեկավար Սթիվ Բալմերը կլքի իր պաշտոնն արդեն մոտ ապագայում: Այս մասին այսօր տեղեկացնում է Forbes ամսագիրը՝ հավելելով, որ փորձագետներն ու շուկայի մասնակիցները սկսել են հավատալ սրան, քանի որ ընկերության ակցիաների գները սկսել են աճել:
Այն լուրերը, որ Բալմերը հեռանում է, հայտնվել էին այն ժամանակ, երբ Greenlight Capital ներդրումային հիմնադրամի ղեկավար Դևիդ Այնհորնը պահանջեց Microsoft-ի ղեկավարի հրաժարականը՝ անվանելով նրան «բեռ ընկերության համար»: «Նա ջարդում է Microsoft-ի բաժնետոմսերը»,- ասել էր Այնհորնը: Նշվում է, որ Բալմերի հրաժարականի ֆոնին ընկերության բաժնետոմսերի գինը երեկ աճել է միանգամից 2.4%-ով կամ $0.60-ով:
Բալմերը Microsoft է եկել 1980-ականներին Բիլ Գեյթսի հրավերով: Նրանք միասին սովորել են Հարվարդի համալսարանում: 90-ականներին նա զբաղվել է MS-DOS և Windows օպերացիոն համակարգերով: 2008 թ. Բալմերն այդ ընկերության ղեկավարի պաշտոնում փոխարինել է Բիլ Գեյթսին:
