Georgia Today կայքի փոխանցմամբ՝ Կովկասի խաղաղության, ժողովրդավարության ու զարգացման ինստիտուտը (CIPDD), որը հանդիսանում է տեղական քաղաքական ուղեղային կենտրոն, առաջ է քաշել մի նախագիծ, որը միտված է Վրաստանում բնակվող ազգային փոքրամասնությունների ինտեգրմանը։
Խոսքը հայաբնակ Ջավախքի և ադրբեջանաբնակ Քվեմո Քարթլիի (Բորչալու) մասին է։ Քվեմո Քարթլիի բնակչության 66 տոկոսը ադրբեջանցիներ են, իսկ Ջավախքի բնակչության 94 տոկոսը՝ հայեր։ 2002 թվականի տվյալներով, Վրաստանի բնակչությունը կազմել է 4.37 միլիոն մարդ։ Դրա 12 տոկոսը կազմել են ադրբեջանցիները (284,148 մարդ) և հայերը (249,175 մարդ)։
Նոր նախագծով ենթադրվում է իրականացնել մի շարք կրթական և մշակութային նախաձեռնություններ, որոնք միտված կլինեն դպրոցների ու տարածաշրջանների միջև մշակութային կապերի փոխանակմանը, քաղաքացիական հասարակության իրազեկվածության մակարդակի բարձրացմանը, երիտասարդների միջև սոցիալ-մշակութային շփումների ակտիվացմանը։
Վրաստանի կրթության և գիտության նախարարության տվյալներով՝ Վրաստանի պետական դպրոցներում սովորող աշակերտներից մոտ 72,000-ը ազգային փոքրամասնությունների ներկայացուցիչներ են, որոնցից 67,953-ը (մոտ 94 տոկոս) հաճախում է ոչ վրացական դպրոցներ։
Ներկայումս վրացերենը պարտադիր է համարվում բոլոր միջնակարգ դպրոցներում, այդ թվում՝ նաև ազգային փոքրամասնությունների 40 պետական դպրոցներում։ Սակայն վերոնշյալ շրջաններում վրացերենի հետ սահմանափակ շփումների պատճառով ազգային փոքրամասնությունների ներկայացուցիչներին միշտ չէ, որ հաջողվում է ֆունկցիոնալ առումով տիրապետել վրացերենին։
Նոր նախագիծը նրանց կօգնի, իրենց ազգային կրթական ծրագրերի հետ մեկտեղ, բարելավել վրացերենի իմացությունը։ Դա ազգային փոքրամասնություններին հնարավորություն կընձեռի լիակատար մասնակցություն ունենալ քաղաքական, քաղաքացիական և տնտեսական գործունեությանը։
Այս նախագիծը կտևի 2.5 տարի, մինչև 2013 թվականի սեպտեմբերը։ Դրանում ընդգրկվելու են Քվեմո Քարթլիի և Ջավախքի ավելի քան 60 միջնակարգ դպրոցների 500 աշակերտներ։
Նախագծի շնորհիվ բարենպաստ պայմաններ կստեղծվեն միջմշակութային երկխոսության համար։ Ոչ վրացական պետական դպրոցներում սովորողները հնարավորություն կունենան այլ անձանց հետ շփվել տարբեր գործունեության միջոցով՝ ներառյալ ամառային դպրոցները, գրողների, նկարիչների, երաժիշտների, քաղաքական գործիչների, գիտնականների ու լրագրողների հետ շփումները։ Բացի այդ, Թբիլիսիում և Վրաստանի այլ շրջաններում կազմակերպվելու են վիկտորինաներ, ինտելեկտուալ խաղեր, էքսկուրսիաներ։
