Նախօրեին Երևանում՝ Ազատության հրապարակում հավաք էր իրականացվում, որտեղ մարդիկ դեմ էին արտահայտվում հողեր հանձնելուն, չնայած շատերի համար, նաև լրագրողների համար պարզ չէր այդ օրակարգը, քանի որ այդպես էլ չհիմնավորվեց, թե ով է հող հանձնում, և ինչի դեմ են այս պարագայում բողոքում։ Ինչո՞ւ այսօր առաջացավ նման պահանջ, կա՞ նման մտավախություն «Առաջին լրատվական»-ի հարցին Ազգային ժողովի «Իմ քայլը» դաշինքի պատգամավոր Արուսյակ Ջուլհակյանը պատասխանեց․ «Ես իրականում մի փոքր տարակուսած եմ այդ հավաքի կապակցությամբ, քանի որ չեմ հասկանում, թե ինչի դեմ է այն։ Ըստ էության՝ տպավորությունս այնպիսին է, որ հողմաղացների դեմ է, որովհետև հավաքի կազմակերպիչները, ինչպես նաև հավաքի մասնակիցները նշում են, որ իրենք հավաքվել են պայքարելու հողերի հանձնման դեմ, այն դեպքում, երբ օրակարգում նման հարց ընդհանրապես չկա։ Եթե քննարկենք այն հարցը, թե ում կողմից են այդ հողերը հանձնվում, ապա ներկա իշխանությունները՝ ի դեմս վարչապետ Նիկոլ Փաշինյանի, բազմիցս նշել են, որ նման օրակարգ չկա, և Հայաստանի Հանրապետությունը չի պատրաստվում հանձնել ոչ մի հող․ «հողեր խաղաղության դիմաց» թեզը գոյության իրավունք չունի։ Դա նշվել է բազմիցս, և այս համատեքստում նման հավաք կազմակերպելն ինձ համար խիստ անհասկանալի է»։
«Այս ամենը, ինչ որ կազմակերպվում է, առաջին հայացքից կարող է դիտվել որպես տեղեկատվական պատերազմ այսօրվա իշխանությունների նկատմամբ, բայց իրականում, ցավոք, դա պատերազմ է Հայաստանի պետականության դեմ։ Ես շատ ցավում եմ, որ մարդիկ, որոնք նախկինում զբաղեցրել են գլխավոր պաշտոններ, պայքարելով ներկա իշխանությունների դեմ՝ սահմանն այնքան են անցնում, որ հարված են հասցնում Հայաստանի պետականությանը, ազգային անվտանգությանը։ Ես կարծում եմ՝ յուրաքանչուրս պետք է գիտակցի, որ կան սահմաններ, որոնք ուղղակիորեն չի կարելի անցնել»,- հավելեց ԱԺ պատգամավորը։
Մանրամասն՝ տեսանյութում։