Ազգային անվտանգության հարցերով ԱՄՆ նախագահի խորհրդական Ջոն Բոլթոնը Վենեսուելայի բանակին ընտրության առաջ դրեց՝ կոչ անելով զինվորներին պաշտպանել ժողովրդին, գրում է segodnya.ua-ն:
«Վենեսուելայի զինված ուժերը ընտրություն ունեն` ընդունել ժողովրդավարությունը, պաշտպանել խաղաղ բնակչությանը և թույլ տալ մարդասիրական օգնություն տրամադրել, հակառակ դեպքում՝ է՛լ ավելի մեծ պատժամիջոցների և մեկուսացման առաջ կկանգնեն», – ասել է Բոլթոնը:
Իր հայտարարությանը նա կցել է Reuters լրատվական գործակալության հոդվածը, նշելով, որ արդեն հաջորդ շաբաթ Վենեսուելայի զինված ուժերի նկատմամբ նոր պատժամիջոցներ կկիրառվեն:
Բացի այդ, ԱՄՆ-ը դատապարտում է Վենեսուելայի քաղաքացիների վրա Վենեսուելայի առաջնորդ Նիկոլաս Մադուրոյի կողմնակիցների հարձակումները: Նման ուղերձ Twitter-ում շաբաթ օրը գրեց ԱՄՆ պետքարտուղար Մայքլ Պոմպեոն:
«Միացյալ Նահանգները դատապարտում է Վենեսուելայում Մադուրոյի գանգստերների հարձակումները քաղաքացիական անձանց վրա: Այս հարձակումները խաղաղ բնակչության մահվան և վնասվածքների պատճառ են դարձել»,- գրել է ամերիկյան դիվանագիտության ղեկավարը:
