Եգիպտոսի նախկին նախագահ Մուհամմադ Մուրսիի դեմ նոր դատավարությունը՝ լրտեսության մեղադրանքով, կմեկնարկի Կահիրեում: Պետության նախկին նախագահի հետ միասին այս գործի առաջին լսումներին պետք է ներկայանան նաև իսլամիստների ևս 35 առաջնորդներ, այդ թվում՝ «Մուսուլման եղբայրների» հոգևոր առաջնորդ Մուհամեդ Բադիան:
Մասնավորապես, նրանք բոլորը մեղադրվում են «օտարերկրյա կազմակերպությունների հետ» գործարքի մեջ, որոնց նպատակն էր երկրի ներսում իրականացնել ահաբեկչություններ և «ռազմական գաղտնիքը հայտնել այլ պետության», ինչը կապված էր Եգիպտոսի պաշտպանունակության հետ:
Բացի այդ, իսլամիստների ղեկավարությանը վերագրվում է ահաբեկչության ֆինանսավորում, նպատակներին հասնելու համար իրենց ակտիվիստների ռազմական նախապատրաստություն և մի շարք գործողություններ, որոնք առնչվում են Եգիպտոսի ինքնիշխանությանը և նրա տարածքային ամբողջականությանը:
Գլխավոր դատախազության կողմից պատրաստված փաստաթղթերում նշվում է, որ «եղբայրները» մասնակից են վերջին մի քանի տարիների ընթացքում Եգիպտոսում տեղի ունեցած բռնության ակտերին և ահաբեկչություններին: Բացի այդ, ասոցիացիայի առաջնորդներին մեղադրում են այն բանում, որ նրանք պատրաստել են «ահաբեկչական ծրագիր», որը ենթադրում էր համագործակցություն պաղեստինյան ՀԱՄԱՍ, լիբանանյան «Հըզբոլլահ» շարժումների, ինչպես նաև «Իսլամական հեղափոխության պահապաններ»-ի իրանական կորպուսի հետ:
Հայտնի է, որ Մուրսին մեղադրվում է նաև մի քանի տարի առաջ անկարգությունների ժամանակ ցուցարարների սպանության մեջ:
Եթե ապացուցվի Մուրսիի կամ նրա շրջապատի մեղքը սպանության գեթ մեկ դրվագում կամ լրտեսության մեջ, մեղադրյալներին կսպառնա մահապատիժ:
