Փետրվարի յոթին Սոչիում մեկնարկեցին 22-րդ ձմեռային օլիմպիական խաղերը: Այս խաղերը օլիմպիադաների պատմության մեջ կմտնեն երևի թե որպես ամենահակասականներից և աղմկահարույցներից մեկը:
Խաղերն արդեն իսկ ամենաթանկն են` նույնիսկ ամառային օլիմպիադաների համեմատ. ծախսվել է 52 միլիարդ դոլար: Սակայն, այս ծախսերով հանդերձ, ինչպես պարզվեց, օլիմպիադայի կազմակերպչական աշխատանքներում եղել են համատարած թերացումներ, շատ գործեր չեն հասցվել ավարտին, շատերը հասցվել են ուղղակի խայտառակ վիճակում: Եվ այս ամենը հայտնվել է ինտերնետային տարածքում` դառնալով լայն հանրության սեփականություն ողջ աշխարհում:
Առանց խնդիրների չանցավ նաև բացման հանդիսավոր արարողությունը, որի ընթացքում չբացվեց օլիմպիական օղակներից մեկը: Միևնույն ժամանակ, բացման արարողությունն ընդհանրապես իսկապես տպավորիչ էր իր գույներով, փայլով, գեղարվեստական մի շարք մտահղացումներով, ինչը, իհարկե, հատուկ է ռուսներին, և ինչը, իհարկե, նրանք կարողանում են անել:
Բայց, այս ամենով հանդերձ, օլիմպիադայում, իհարկե, գլխավորը տոնն է, որն ապահովում են մարզական մրցումները: Այս տեսանկյունից, աշխարհը առաջիկա երկու շաբաթների ընթացքում կապրի տոնական տրամադրությամբ: Ինչպես ասում են, օլիմպիադայում կարևորը մասնակցությունն է, ոչ թե հաղթանակը: Սակայն, միևնույն ժամանակ, վաղուց արդեն մարզաշխարհում այս խոսքերը ինչ-որ առումով մոռացության են մատնված, և օլիմպիական հաղթանակը դարձել է յուրաքանչյուր մարզիկի երազանք:
Մի քանի հազար մարզիկներ առաջիկա շաբաթվա ընթացքում շատ մոտեցած են լինելու իրենց երազանքին: Իսկ այդ իրողությունն էլ տոն է միլիոնավոր մարզասերների համար: Եվ անկախ օլիմպիական աղմկահարույց այս նախապատմություններից, որոնք այլ կատեգորիա են և իհարկե` հանդիսանում են պետական որակների շատ խոսուն ինդիկատորներ, այնուհանդերձ մաղթենք մարզասերներին և մարզիկներին հաճելի, անվտանգ և դիտարժան երկու շաբաթներ:
Միևնույն ժամանակ, մենք մեզ համար անենք հետևություններ այն ինդիկատորներից, որոնք եղան ինտերնետային լուսանկարների և տեղեկատվությունների միջոցով: Ինչո՞ւ մենք, չէ՞ որ օլիմպիադայի կազմակերպչական աշխատանքները մեզ հետ կապ չունեն: Կազմակերպչական աշխատանքները` այո, բայց մեզ հետ կապ ունի Ռուսաստանը՝ կազմակերպիչը, կամ ավելի շուտ` մենք ավելի ու ավելի շատ կապվում ենք Ռուսաստանի հետ, այսինքն` այն միջավայրի, որտեղ ծախսում են օլիմպիադայի համար ռեկորդային թվով գումարներ, սակայն միևնույն ժամանակ արձանագրվում են ռեկորդային թվով և բովանդակությամբ թերացումներ:
Այնպես որ, առաջիկա երկու շաբաթը վայելենք օլիմպիական մարզական տոնը, իսկ հետո կատարենք աշխատանքային հետևություններ` հասկանալու համար, թե ինչ «կուպեում» ենք մենք հայտնվել:
