Ըստ ռուսական «Կոմերսանտ» պարբերականի՝ ՌԴ ԱԳՆ ներկայացուցիչը հայտարարել է, որ Հայաստանի դիրքորոշման պատճառով ՀԱՊԿ նոր գլխավոր քարտուղարի ընտրությունը հետաձգվում է մինչև 2020 թվականը: Թեմայի շուրջ զրուցելու համար «Առաջին լրատվական»-ը հյուրընկալել է քաղաքագետներ Ռոբերտ Ղևոնդյանին և Ռուբեն Մեհրաբյանին:
Վերջինիս խոսքով՝ դա ոչ թե Փաշինյանի դիրքորոշման պատճառով էր, այլ ՀԱՊԿ-ի՝ որպես դեֆեկտիվ կառույցի, առանձնահատկությունից բխող իրավիճակ: «Այսինքն՝ սա մի կազմակերպություն է, որտեղ տարրական հարցի շուրջ պայմանավորվել հնարավոր չէ, և ընդամենը հայկական կողմը վերահաստատեց իր սկզբունքային դիրքորոշումը»,- հավելեց Ռուբեն Մեհրաբյանը:
Քաղաքագետի խոսքով՝ ոմանք սա կհամարեն հաղթանակ, ոմանք՝ արտաքին քաղաքականության տապալում, իսկ որոշ «մտահոգվածներ» մի հատ էլ կմտահոգվեն սրա առթիվ. «Իսկ փաստերից դատելով՝ ռուսական կողմը հաշտվել է այն մտքի հետ, որ հայկական կողմը հետ չի կանգնի իր դիրքորոշումից, և եթե Հայաստանի կողմից ներկայացված թեկնածուին չեն հաստատում, ապա չի հաստատվի ոչ մի թեկնածու՝ մինչև 2020 թվականի Նոր տարին: Իսկ պարոն Զասն էլ ավել-պակաս դուրս տալով Հայաստանի հասցեին՝ միևնույն է, Երևան հրավերին չի արժանանալու»:
Ռոբերտ Ղևոնդյանն էլ սա համարում է դիվանագիտական հաղթանակ. «Իհարկե, ոչ լիարժեք, քանի որ կարգավիճակը պահպանել չհաջողվեց, բայց դա վաղուց էր պարզ, որովհետև 6-հոգանոց կառույցի մյուս 5 երկրներն արդեն ընդունել էին մյուս թեկնածուին»:
Նրա խոսքով՝ Բելառուսի ներկայացուցիչ Զասը շատ մեծ խնդիր էր դրել իր առջև, որը փաստացի տեսանք, որ չկարողացավ իրականացնել. «Դա էլ հավանաբար նրան հունից հանեց և, ինչպես նշեց պարոն Մեհրաբյանը, դուրս տվեց որոշ բաներ, բայց մեր ԱԳՆ-ն բավական համոզիչ պատասխանեց»:
Հարցազրույցն ամբողջությամբ՝ տեսանյութում: