Վարորդների ուրախությունը կարճ տևեց։ Մի քանի օր շարունակ անկում ապրող բենզինի գինն այսօր արդեն 10-20 դրամով թանկացել է՝ դառնալով 410-420 դրամ։ Բենզինի թանկացման մասին նախօրեին խոսեց նաև «Ֆլեշ» ընկերության սեփականատեր Բարսեղ Բեգլարյանը՝ Ֆլեշի Բարսեղը։ Նա դատարանում ի պատասխան լրագրողների հարցին՝ բենզինը կթանկանա՞, թե՞ ոչ, պատասխանել էր. «Առաջիկայում բենզինի գները շատ ուժեղ կբարձրանան: Որովհետեւ միջազգային գները շատ ուժեղ բարձրանում են՝ արդեն մոտ 10 օրվա ընթացքում գրեթե 70-80 դոլար բարձրացել են:
Անպայման բարձրանալու է գինը»։
Սպառողների իրավունքների պաշտպանությամբ զբաղվող՝ «Իրազեկ և պաշտպանված» ՀԿ նախագահ Բաբկեն Պիպոյանն «Առաջին լրատվական»-ի հետ զրույցում ասաց, որ իրենք էլ են 10 դրամ թանկացում արձանագրել, սական լուրջ ուսումնասիրություն դեռևս չեն կատարել՝ պատճառները պարզելու համար։
Մեր դիտարկմանը՝ միջազգային շուկայում տեղի ունեցած գնային փոփոխությունները կարո՞ղ էին այդքան արագ անդրադառնալ հայաստանյան գների վրա, Պիպոյանը պատասխանեց, որ բենզինի միջազգային շուկայում գնային որոշակի փոփոխություններ վաղուց են նկատվել, սակայն այդ փոփոխությունների արդյունքում Հայաստանում գները ոչ միայն չէին բարձրացել, այլև նվազել էին: «Բենզինը միջազգային շուկայում ավելի շուտ էր թանկացել, բայց թե դա կարո՞ղ էր ազդել հայաստանյան գների վրա՝ պետք է ուսումնասիրենք»,- ասաց Պիպոյանը։
Էներգետիկ փորձագետ Վահե Դավթյանի խոսքով՝ Հայաստանում վերջին օրերին արձանագրվող բենզինի գնաճը պայմանավորված է մի քանի գործոններով: Նախ՝ շուկան մոնոպոլիզացված է, իսկ ներկրումը՝ ոչ դիվերսիֆիկացված: Առկա է ընդամենը մեկ ներկրող՝ «Ռոսնեֆտ-Արմենիան», որը և վաճառում է հիմնականում Ռուսաստանից ներկրվող բենզինը տեղական ընկերություններին, իսկ Ռուսաստանում 2019թ.-ի սկզբից նկատվում է բենզինի գների աճ, ինչն առավելապես պայմանավորված է ԱԱՀ-ի բազային դրույքաչափի աճով, որը 18 տոկոսից հասել է 20-ի:
Մյուս պատճառը, ըստ փորձագետի, նավթի համաշխարհային շուկայում առկա վայրիվերումներն են: «Եթե 2018 թ. նավթի գինը կտրուկ նվազեց՝ 80 դոլարից հասնելով մոտ 50-55-ի, ապա տարեվերջին նկատելի է նավթի գնի աճի միտում, որը շարունակվում է նաև այսօր: Նավթն այսօր համաշխարհային շուկայում մոտ 65-67 դոլար արժե, և վերլուծաբանները խոսում են մինչև 75 դոլար աճի մասին»,- ասաց Դավթյանը՝ հավելելով, որ բենզինի գնի բարձրացման երրորդ պատճառը երկրի ներսում սպառման ծավալների շարունակական նվազումն է:
«Այսօր Հայաստանը թերևս առաջատարն է աշխարհում բնական գազը որպես շարժիչային վառելիք օգտագործելու ցուցանիշներով: Ավելին՝ վերջին շրջանում շուկայում գնալով ավելի պոպուլյար է դառնում հեղուկ գազը, ինչը մոտ ապագայում կարող է մրցել ավանդական գազի հետ՝ հատկապես, որ ապրիլի 1-ից Հայաստանի ԱԳԼՃկ-ներում գազը վաճառվելու է կիլոգրամներով, ինչը կարող է հանգեցնել որոշակի գնաճի»,- եզրափակեց փորձագետը:
Լուսանկարը՝ Armeniasputnik-ի
