Վերջերս հանրության շրջանում լուրեր են տարածվում, թե «Բջնի» հանքային ջրերի գործարանը վերադարձրել են Սուքիասյանը ընտանիքին: Այդ կապակցությամբ «Առավոտը» պարզաբանումների խնդրանքով դիմել է «Սիլ կոնցեռնի» բաժնետեր Սարիբեկ Սուքիասյանին:
Թե որքանով են իրականությանը համապատասխանում «Բջնին» վերադարձնելու մասին լուրերը, գործարարը պատասխանել է. «Գործարանը, ինչպես գիտեք, խլեցին մեզանից ավագ եղբորս՝ Խաչատուր Սուքիասյանի քաղաքական դիրքորոշման պատճառով: Եվ ոչ միայն գործարանը, այլ նաև «Բջնի» և «Նոյ» ապրանքանիշերը, բրենդը: Օտարեցին՝ ոտնահարելով մեր քաղաքացիական և գործարար արժանապատվությունը, գրված և չգրված բոլոր օրենքները: Սակայն, մենք պայքարել ենք և պայքարելու ենք սեփականության մեր իրավունքները վերականգնելու համար: Եվրոպական դատարանը տևական ժամանակ է, ինչ վարույթ է ընդունել և ուսումնասիրում է մեր հայցը, և ես համոզված եմ, որ մենք կհասնենք հաջողության: Այս պարագայում մեր նպատակը ոչ միայն մեր գույքը վերադարձնելն է: Իշխանությունները պետք է սովորեն հարգել և պաշտպանել մասնավոր սեփականության իրավունքը, առանց այդպիսի վերաբերմունքի ավելորդ է խոսել երկրի զարգացման մասին:
Անդրադառնալով մամուլում և սոցիալական կայթերում պարբերաբար հայտնվող Սուքիասյանների ընտանիքին վերաբերող իրականությունն աղավաղող նյութերին՝ ասել է. «Փիլիսոփայորեն եմ վերաբերվում: Ցավոք, հաճախ են հայտնվում լուրի տեսք ստացած բամբասանքներ ու ասեկոսեներ, որոնց մի մասը, իհարկե, պատվիրված է: Ես մեծ հարգանքով եմ վերաբերվում լրագրողի աշխատանքին: Նաև, մենք չենք մոռանում զանգվածային լրատվամիջոցների աջակցությունը, երբ մեր ընտանիքը ենթարկվում քաղաքական և տնտեսական ճնշումների։ Մնացածը մանր և անցողիկ բաներ են»:
Թե որտեղ է և ինչով է զբաղվում Խաչատուր Սուքիասյանը, պատասխանել է. «Խաչատուրն արտերկրում է, աշխատում է մեծ համացանցային ծրագրի վրա, որի մասին շուտով բոլորս տեղյակ կլինենք։ Նրա դիրքորոշման մեջ որևէ փոփոխություն չկա»:
