«ՀՀ բոլոր երեք նախագահներն էլ՝ Լևոն Տեր-Պետրոսյանը, Ռոբերտ Քոչարյանը, Սերժ Սարգսյանը, երկրապահներ են եղել, բռնած շարքայինից՝ դարձել են նախագահ, հո նախագահ չե՞ն ծնվել»,- ԵԿՄ 10-րդ հոբելյանական համագումարից հետո մի քանի լրագրողների հետ զրույցում ասաց Արցախի հերոս, գեներալ-լեյտենանտ Մանվել Գրիգորյանը:
Լրագրողի այն հարցին, թե ի՞նչ նկատի ուներ՝ Սերժ Սարգսյանին ասելով «վերջին բոլշևիկ», Մանվել Գրիգորյանն ասաց. «Մեզնից մեկը, որ հիմա նախագահ է, մենք էլ ենք պասլեդնի բոլշևիկների մեջ, դա ասացվածք է»,- ասաց նա:
Հարցին՝ համակարծի՞ք է արդյոք գործող նախագահ Սերժ Սարգսյանի՝ ազատամարտիկների հասցեին հնչեցրած այն գնահատականներին, որ նրանք նվնվացող են, Մանվել Գրիգորյանն ասաց. «Նվնվացողներին՝ այո, եթե մենք երկրում առաջնային խնդիրներ ունենք՝ սոցիալական, ժողովրդի, պետության սահմանների պտպանության, այո, իմ պես և իմ նման բոլոր ազատամարտիկները այդպես են մտածում: Չտեսա՞ք, որ ձեր աչքի առաջ հաշմանդամ տղան բարձրացավ, երկու ոտքը վրեն չէր, տեսա՞ք ինչից խոսեց՝ լավ մտքերով արտասանեց, որ հայ ժողովուրդը չի կարող նվնվան լինել: Մենք միլիոն ու կես կոտորվել ենք. ցեղասպանություն ենք տարել, բայց չենք խեղճացել:
Ազատամարտիկներին չի սազում, քաղաքականությունով, այո, Լևոն Տեր-Պետրոսյան, Արտաշես Գեղամյան, Ռոբերտ Քոչարյան, եսի՞մ՝ այնտեղ շատ կան էլի քաղաքական կուսակցությունների ղեկավարներ, իսկ ուսադիր կրող մարդը այս երկրում ասելու, խոսալու տեղեր ունի, պետք է լինեն փողոցով, հրապարակային խոսակցությունո՞վ անեն, չի լուծվում, հասկանում ես՝ այդպես հարցերը չի լուծվում: Քաղաքական գործիչները թե ղեկավար կփոխեն, թե այլ բան՝ իրենց խնդիրն է, իսկ այդ ազատամարտիկը պետք է մնա զինվոր, երեք նախագահների ժամանակ էլ ես ծառայել եմ, կատարել եմ բոլորի հրամաններն անխտիր»:
Նրա խոսքերով՝ ազատամարտիկն առաջինը ինքը իրեն պետք է գնահատի որպես ազատամարտիկ, որ իրոք. «Այսօր ավելի շատ կարևոր խնդիրներ կան, խնդիրներ կան գաղթի, մեր սահմանների պաշտպանության, իսկ մենք այսօր բացի հավատարմություն պահպանելուց ուրիշ բան չունենք:
Ճիշտ է, նեղված են, իրավունք ունեն ասելու, ոչ ոք իրենց իրավունքներից զրկելու իրավունք չունի, բայց որ հելնենք ասենք հեղափոխություն ենք անում, չէ: Այդ նույն մարդիկ իրենք էլ են երեք նախագահներին ծառայել, այդպես չի լինի՝ այսօր ծառայես, վաղը հայհոյես»:
Լրագրողները Մանվել Գրիգորյանից հետաքրքրվեցին նաև, թե ինչով է բացատրվում Սամվել Ալեքսանյանին ԵԿՄ վարչության կազմում ընգրկելը. «Սամվել Ալեքսանյանը, ցավդ տանեմ, հինգերորդ բրիգադայի սպա է եղել, նա արդեն մոտ մի տասնհինգ-քսան տարի ԵԿՄ անդամ է, Մալաթիայում խորհրդի անդամ է եղել, նույնիսկ Զատիկյանի ժամանակվանից այդ տարածքի խորհրդի անդամ է եղել: Նույնիսկ ամենաառաջինն ինքը միշտ կանգնել օգնել է զոհված զինվորների հարազատներին: Նենց եք ասում, ինչու երիտասարդներ կան, երկրապահ բոլոր տեսակի մարդիկ էլ կան: Ճիշտ է, Սամվել Ալեքսանյանը օլիգարխ է, ինչ ուզենք հետևից կարանք ասենք, բայց անում է, չէ՞, ինչու օլիգարխներն այս երկրի անդամներ չե՞ն»:
