Այսօր «Առաջին լրատվական»-ը հարցում է իրականացրել ՀՀ քաղաքացիների շրջանում՝ պարզելու համար, թե որքանով են վերջիններս հնարավոր համարում ՀՀ երկրորդ նախագահ Ռոբերտ Քոչարյանի վերադարձը քաղաքականություն:
«Առաջին հերթին մենք երկրորդ նախագահ չենք ունեցել և ոչ էլ երրորդ նախագահ ենք ունեցել, և հիմա երկրորդը բարոյական իրավունք չունի վերադարձի մասին խոսելու»,- մեզ հետ զրույցում նշեց ՀՀ քաղաքացիներից մեկը, ով նաև հավելեց, որ իր նախագահությունից հետո Ռոբերտ Քոչարյանը պետք է գնար Ղարաբաղ՝ իր հայրենիքը: Նա ընդգծեց, որ Ռոբերտ Քոչարյանի օրոք լավ չենք ապրել, ճգնաժամի պատճառը սկսվեց նրա օրոք, ո՞ւմ է պետք Հյուսիսային պողոտան. «Ընդհանրապես ի՞նչ է տվել այդ մարդը ՀՀ-ին, ոչ մի օգուտ՝ ո՛չ նյութական, ո՛չ բարոյական: Ես շատ մարդկանց անունից եմ ասում՝ նա իրավունք չունի մտածել վերադառնալու ուղղությամբ»:
Կային մարդիկ, ովքեր ասացին, թե իրենք չեն որոշում՝ ով կլինի նախագահ:
Կային նաև դրական կարծիքներ: «Ռոբերտ Քոչարյանը եկավ՝ քանդված երկիրը նորից ոտքի կանգնեցրեց»,- ասաց հարցվածներից մեկը:
