Փետրվարի 15-ին ՀՀ Արտակարգ իրավիճակների նախարարությունում կայացավ Փրկարար ծառայության ընդլայնված խորհրդակցություն, որը վարեց ծառայության տնօրեն, փ/ծ գնդապետ Արտակ Նահապետյանը:
Խորհրդակցությանն առցանց մասնակցող Արցախի Հանրապետության արտակարգ իրավիճակների պետական ծառայության, Երևան քաղաքի և ՀՀ մարզային փրկարարական վարչության պետերը, ինչպես նաև ԱԻ նախարարության տարբեր ստորաբաժանումների ղեկավարները զեկուցեցին փետրվարի 8-ից 15-ն ընկած ժամանակահատվածում գրանցված ահազանգերի, ձեռնարկված միջոցառումների և տրանսպորտային միջոցների տեխնիկական վիճակի մասին:
Արագածոտնի և Կոտայքի մարզային փրկարարական վարչության պետերը զեկուցեցին, որ նախապատրաստական աշխատանքներ են տարվում «Ուժեղ երկրաշարժի դեպքում բնակչության պաշտպանության միջոցառումների կազմակերպում» թեմայով շտաբային ուսումնավարժությունն ամենամյա պլանով նախատեսված ժամանակահատվածում իրականացնելու համար:
Մարզային փրկարարական վարչության պետերը զեկուցեցին մարզերում ճանապարհների անցանելիության, տրանսպորտային միջոցների արգելափակման, փրկարարական աշխատանքների մասին:
Արցախի Հանրապետության Արտակարգ իրավիճակների պետական ծառայությունում հաշվետու ժամանակահատվածում գրանցվել է 263 զանգ, որից 23-ը՝ արտակարգ դեպք-պատահար:
ՀՀ ԱԻՆ ՃԿԱԿ «911» ծառայությունում նախորդ շաբաթվա ընթացքում գրանցվել է 23080 զանգ, սպասարկվել է 557 ահազանգ, որից 87-ը՝ արտակարգ բնույթի:
Երևան քաղաքի փրկարարական վարչությունում նույն ժամանակահատվածում գրանցվել է 28 հրդեհի դեպք և 18 ճանապարհատրանսպորտային պատահար:
Շիրակի մարզային վարչության պետը զեկուցեց, որ Շիրակի մարզում նոր հրշեջ-փրկարարական ջոկատների տեղակայման համար արդեն կատարվել են հողահատկացումներ, և շուտով կմեկնարկեն շինարարական աշխատանքները:
Փրկարար ծառայության տնօրեն, փ/ծ գնդապետ Արտակ Նահապետյանը կարևորեց փրկարար ծառայության համագործակցությունը գործադիր իշխանության տարածքային և տեղական ինքնակառավարման մարմինների հետ, որը հնարավորություն կտա ավելի արդյունավետ իրականացնել առաջադրված խնդիրները:
Արտակ Նահապետյանը շնորհավորեց մարզային փրկարարական վարչության նորանշանակ պետերին, որոնք ռոտացիոն կարգով նշանակվել են այլ մարզային վարչություններից ու փրկարար ծառայության կենտրոնական ապարատից, ինչպես նաև խոսեց փրկարար ծառայությունում մեկնարկած կառուցվածքային փոփոխությունների մասին:
Խորհրդակցության ավարտին Փրկարար ծառայության տնօրեն, փ/ծ գնդապետ Ա. Նահապետյանն ամփոփեց խորհրդակցության արդյունքները և տվեց մի շարք հանձնարարականներ, որոնք, մասնավորապես, վերաբերում էին կադրային քաղաքականությանը, գույքի և տեխնիկայի սպասարկման ու օգտագործման վերաբերյալ հարցերին, ինչպես նաև աշխատանքային կարգապահությանը և այլ հարցերի:
