ԱՄՆ պաշտպանության նախարարության հեռանկարային հետազոտական ծրագրերի վարչությունում (DARPA) եկել են այն եզրահանգման, որ ամերիկյան զորքերի համար մարտի դաշտում առավելություն կարող է դառնալ բջջային օգնականը: Ինչպես հաղորդում է ITAR-TASS-ը, սկսել է մշակվել կապի համակարգ, որը կմիավորի ժամանակակից սմարթֆոնների և ռազմական շարժական ռադիոկայանների առավելությունները:
Հիմնական խնդիրներից մեկը, որի հետ բախվել են հետազոտողները, մարտական պայմաններում սմարթֆոն օգտագործելու համար ենթակառուցվածքի բացակայությունն էր:
Արդյունքում գիտնականները մտածել են՝ ինչպես ստեղծել սեփական բջջային ցանց՝ օգտագործելով ռազմական ռադիոկայանների փորձարկված մոդիֆիկացիաներ:
Նման լուծման առավելություններից է ազդանշանի թվայնացումը: Բացի ձայնային ուղերձից, զինվորները կարող են ստանալ հեռուստահաղորդակցային ծառայությունների ամբողջ փաթեթը, որին սովոր են եղել քաղաքացիական կյանքի ընթացքում: Այսպիսով, մոտակա ժամանակներս ամերիկացի զինվորականները «թեժ կետերում» բացի տեսաչատից և էլեկտրոնային փոստից, կարող են ունենալ նաև ինտերակտիվ քարտեզներ, որոնցում կպատկերվի հակառակորդի տեղաշարժը:
