Բրազիլիայի Առանց հողի գյուղացիներ շարժման շուրջ 20 հազար գյուղացի մասնակիցներ ցույց են արել նախագահական պալատի, կրթության նախարարության ու ազգային կոնգրեսի մոտ, որն ավարտվել է ոստիկանության հետ բախումներով: Այս մասին հայտնում է RIA Novosti-ն՝ հղում կատարելով լատինաամերիկյան ԶԼՄ-ներին:
Բողոքի ակցիայի մասնակիցները պահանջում էին ագրարային բարեփոխման անցկացում ու գյուղատնտեսական կրթության ոլորտում հատկացումների աճ:
Ցույցն սկսվել է նախագահական պալատի մոտ: Ցուցարարները հուսով էին, որ երկրի նախագահ Դիլմա Ռուսեֆը դուրս կգա իր նստավայրից: Սակայն ցուցարարների հետ հանդիպել է Բրազիլիայի նախագահի վարչակազմի ներկայացուցիչ Ժիլբերտու Կարվալյուն, որին է հանձնվել իշխանություններին ուղղված իրենց պահանջը:
Այնուհետև ցուցարարները շարժվել են երկրի կրթության նախարարություն, ապա Կոնգրեսի շենք, որտեղ բողոքի ակցիան ավարտվել է ոստիկանական ստորաբաժանումների հետ բախումներով:
Մի շարք ԶԼՄ-ներ հայտնել էին ոստիկանական գործողությունների հետևանքով տուժածների մասին, սակայն իշխանությունների պաշտոնական ներկայացուցիչները դեռ չեն հաստատել այդ տեղեկությունը:
