Ըստ Արմենպրեսի՝ ՀՀ-ում ՌԴ դեսպանատան և ՀՀ Սյունիքի մարզպետարանի միջև Կապան քաղաքում ստորագրվել է համագործակցության վերաբերյալ նկատառումների արձանագրություն, որով համաձայնություն է ձեռք բերվել ՀՀ Սյունիքի մարզի Կապան քաղաքում ռուսերեն լեզվով դասավանդմամբ հանրակրթական գիմնազիա ստեղծելու վերաբերյալ:
«Առաջին լրատվականը» փորձեց պարզել, թե որքանո՞վ է օրինական այս փաստաթուղթը՝ հաշվի առնելով, որ նախատեսվում է ՀՀ տարածքում ստեղծել օտարալեզու ուսումնական հաստատություն, այն էլ այդպիսի հաստատության համար ոչ սովորական անվանմամբ՝ հանրակրթական գիմնազիա:
Հիշեցնենք, որ Կրթության և գիտության նախարարությունը դեռևս 2010 թ. ապրիլին «Լեզվի մասին» և «Հանրակրթության մասին» օրենքներում փոփոխությունների նախագիծ էր ներկայացրել, ըստ որի՝ հանվելու էր օտար լեզվով դասավանդմամբ դպրոցներ բացելու՝ 1993 թ. մտցված արգելքը: Այս օրինագիծն աննախադեպ հանրային հակազդեցության հանդիպեց, ստեղծվեց և թափ առավ դիմադրության շարժում, որի կազմակերպչական աշխատանքները համակարգում էր «Մենք դե՛մ ենք օտարալեզու դպրոցների վերաբացմանը» քաղաքացիական խումբը:
Օրենսդրական փոփոխությունների փաթեթը, ամիսներ շարունակ գտնվելով մամուլի և սոցիալական մեդիայի ուշադրության կենտրոնում և ենթարկվելով բազմաթիվ փոփոխությունների, դեկտեմբեր ամսին ի վերջո ընդունվեց ԱԺ-ում, իսկ հունվար ամսին այն ստորագրեց Սերժ Սարգսյանը:
Ըստ այդմ՝ Հանրակրթության մասին օրենքով սահմանվում է հետևյալը. «6.1. Ուսումնական հաստատությունները կարող են միջազգային ծրագրեր իրականացնել և օտար լեզուներով կրթություն կազմակերպել բացառապես Հայաստանի Հանրապետության կառավարության որոշումով։ Ուսումնական հաստատությանը օտար լեզվով կրթություն կազմակերպելու թույլտվություն տալու կարգը մշակում է կրթության պետական կառավարման լիազորված մարմինը և ներկայացնում Հայաստանի Հանրապետության կառավարության հաստատմանը։
Օտար լեզվով կրթական ծրագրեր կարող են իրականացնել բացառապես ոչ պետական ուսումնական հաստատությունները, ինչպես նաև միջպետական, միջկառավարական համաձայնագրերով ստեղծված ուսումնական հաստատությունները»:
Թե որքանո՞վ է ՌԴ դեսպանի և Սյունիքի մարզպետի ստորագրած արձանագրությունը համապատասխանում օրենքի այս կետին՝ փորձեցինք պարզել Կրթության և գիտության նախարարության հասարակայնության հետ կապերի բաժնի պետ Արթուր Բաղդասարյանից, սակայն վերջինս հրաժարվեց բանավոր և գրավոր մեկնաբանություններից՝ խնդրելով պաշտոնական հարցում ուղարկել անձամբ նախարարի անունով, որին կպատասխանեն հնգօրյա ժամկետում:
Ուշագրավ է նաև, որ նախորդ տարի «Առավոտի» հետ զրույցում Սյունիքի մարզպետ Սուրիկ Խաչատրյանը հստակ դեմ էր արտահայտվել օտարալեզու դպրոցներին՝ ասելով բառացիորեն հետևյալը. «Օտարալեզու կրթությունը ո՞րն է, հիմա դպրոցում անգլերեն չե՞ն անցնում: Եթե մեկն ուզում է իր երեխան անգլերեն սովորի, թող տանի վճարի, սովորեցնի: Մենք այսօր էլ աշխարհի բարձրակարգ բուհերում ունենք ուսանողներ, որոնք հետ չեն մնում ոչ մեկից թե՛ իրենց լեզվով, թե՛ գիտելիքով, դրա համար պարտադիր չէ, որ նրանք օտարալեզու դպրոց ավարտեն»:
