Կառավարության զարգացման ծրագրի նախագծի սոցիալական պաշտպանությանը և ժողովրդավարությանը վերաբերող դրույթների շուրջ «Առաջին լրատվական»- ի հետ քննարկմանը, անդրադառնալով հարցին, թե որքանով է այս ծրագիրը հեղափոխական և որքանով է արդարացնում հասարակության ակնկալիքները, սոցիոլոգ Արտակ Սաղաթելյանը կարծիք հայտնեց, որ ծրագիրը հեղափոխական չի կարելի համարել. «Այնտեղ հեղափոխական որոշակի նպատակներ կան, բայց չկան ցուցանիշներ, որոնք կփաստեն, որ պարտավորվում ենք այդ նպատակներին հասնել»:
Ժողովրդագիր Արտակ Մարկոսյանը նշեց, որ ժողովրդագրությանը վերաբերող հիմնական դրույթը ծրագրում ներառված է. «Դա ծնելիության խրախուսումն է: 2010թ-ից մեզ մոտ ծնելիության անկում էր գրանցվել՝ 44800-ից իջել է մինչև՝ 36500-ի՝ 2018թ. տվյալներով, և եթե չկարողանանք բարձրացնել ծնելիության մակարդակը, մոտակա ժամանակահատվածում մեզ սպասվում է դեպոպուլյացիա, այսինքն՝ մահերի գերազանցում ծնունդների նկատմամբ, և այդ պարագայում եթե նույնիսկ արտագաղթը դադարի Հայաստանից, միևնույն է, բնակչության թիվը կշարունակի նվազել: Ծրագրում նշված է երիտասարդ ընտանիքների աջակցության մասին: Պետք է խրախուսել, որ երիտասարդները որոշում կայացնեն և ամուսնանան. ունենք 80-ականներին ծնված մարդկանց մեծ խումբ, որոնք դեռևս չեն ամուսնացել, և դա ազդում է ժողովրդագրական վիճակի վատացման վրա»:
Ա. Սաղաթելյանի դիտարկմամբ՝ միայն նպաստներով հնարավոր չէ ծնելիության աճ ապահովել: Նրա խոսքով՝ մեզ մոտ մոտեցում է փոխվել, մարդիկ ավելի նպատակահարմար են գտնում ունենալ մեկ-երկու երեխա, բացի դրանից՝ գյուղական միջավայրում ենթակառուցվածքների՝ մանկապարտեզների խնդիրը լուծված չէ:
Ա. Մարկոսյանը նաև ընդգծեց, որ ժողովրդագրական քաղաքականությունը պետք է ներառի ամբողջական փաթեթ՝ պետք է լինի տնտեսական և օրենսդրական խրախուսում, նաև քարոզչական մեծ աշխատանք պետք է տարվի, մինչդեռ Հայաստանը վերջին 27 տարիներին չի ունեցել հստակ ժողովրդագրական քաղաքականություն:
Մանրամասն՝ տեսանյութում:
