Կոնգրեսմեն Ջոն Դինգելը մահացել է 92 տարեկան հասակում, հաղորդում է The New York Times-ը:
Նա ԱՄՆ պատմության մեջ այդ պոստում ամենաերկարը պաշտոնավարած կոնգրեսմենն է: Առաջին անգամ նա ընտրվել է 1955թ.-ին և Ներկայացուցիչների պալատում ծառայել է 59 տարի, իսկ 2015-ին անցել է թոշակի:
«Նա ԱՄՆ կոնգրեսի առյուծն էր, սիրող որդի, հայր, ամուսին, պապ և ընկեր»,- ասել է նրա կնողջ՝ Դեբի Դինգելի գրասենյակի աշխատակիցը:
Նշվում է, որ Դինգելը, Միչիգանից ընտրված դեմոկրատ կոնգրեսականը, բազմաթիվ առանցքային լիբերալ օրենքների կյանքի կոչման շարժիչ ուժն էր, հատկապես առողջապահության ոլորտում: Նա առանցքային դեր է ունեցել Medicare-ի՝ կառավարության կողմից ֆինանսավորվող տարեցների և հաշմանդամների համար առողջապահական ծրագրի ստեղծման գործում, եղել է առողջապահության ոլորտի համընդհանուր օրենսդրության առաջին կողմնակիցներից մեկը, ներառյալ Բարաք Օբամայի 2010-ի օրենքը:
Դինգելը մահացել է Միչիգանի նահանգի Դիրբորն քաղաքում գտնվող իր տանը: