Քաղաքագետ Գարիկ Քեռյանը դրական է գնահատում Փաշինյան-Ալիև հաճախակի հանդիպումները, բայց արդյոք այդ հանդիպումների արդյունքում որևէ փաստաթղթային համաձայնություն կլինի՝ դժվարանում է նշել։ «Չենք կարողանում գտնել այդ փոխզիջումային տարբերակը, զիջումների այն աստիճանը, որին կողմերը կարող են գնալ։ Բոլոր փորձերը գտնել այն տարբերակը, որը թե՛ Հայաստանի համար ընդունելի կլինի և թե՛ Ադրբեջանի՝ ապարդյուն են»,- «Առաջին լրատվական»-ի հետ զրույցում ասաց նա։
Մեր զրուցակիցն անդրադարձավ նաև հասարակության արձագանքին և սպասումներին և ընդգծեց. «Հասարակությունը մտածում է, որ եթե ինչ-որ բան Ադրբեջանում ասել են՝ լավ է, նշանակում է մեր պարտությունն է։ Բայց այս կոմպլեքսից պետք է դուրս գանք, հնարավոր է լինի փոխհամաձայնություն, որը մասնակիորեն լինի Հայաստանին ձեռնտու, մասնակիորեն՝ Ադրբեջանին»։
Քաղաքագետի դիտարկմամբ՝ Մինսկի խմբի համանախագահող պետությունները ևս իրենց շահերն ունեն այս տարածաշրջանում. «Որոշ առումով ԵՄ-ի ու ԱՄՆ-ի շահերը համընկնում են, բայց, ելնելով այն իրողությունից, որ Ռուսաստանը շատ կոշտ բախում ունի Արևմուտքի հետ՝ պետք է սա նկատի ունենանք։ Յուրաքանչյուրը փորձում է զարգացնել իր հեռուն գնացող ռազմավարական նպատակները։ Ռուսաստանի մտահոգությունն այն է, որ Փաշինյանի հաճախակի շփումներն արևմտյան գործիչների հետ կարող են ինչ-որ տեղ Հայաստանին տանել արևմտյան ազդեցության գոտի, և Հայաստանը համաձայնի այնպիսի կարգավորման տարբերակի հետ, որը ընդունելի չի լինի Ռուսաստանի համար»։
