Ամերիկյան մի շարք բարձրտեխնոլոգիական ընկերությունների, ինչպիսիք են՝ Google-ը, Microsoft-ը, Yahoo!-ն, Facebook-ը, ներկայացուցիչներ նամակ են հղել ԱՄՆ նախագահին և Կոնգրեսին՝ էլեկտրոնային լրտեսությունը դադարեցնելու խնդրանքով:
Նրանց նախաձեռնությունը երեքշաբթի օրը տեղի ունեցած միջազգային ակցիայի մասն է դարձել՝ ընդդեմ օգտատերերի անձնական տվյալների հավաքման:
Ամերիկյան այս պրակտիկայից դժգոհողները ավելի քան 40 հազար էլեկտրոնային նամակ են հղել Կոնգրեսի անդամներին՝ կոչ անելով օրենսդրությունում կատարել փոփոխություններ և սահմանափակել հատուկ ծառայությունների լիազորությունները:
«Կառավարական լրտեսության ծրագրերի մասին հաշվետվությունները ցույց են տալիս, որ գոյություն ունի թափանցիկության և նոր սահմանափակումների իրական պահանջ առ այն, թե կառավարությունն ինչպես է հավաքում տեղեկատվությունը»,- համոզված է ակցիային միացած Facebook ընկերության ղեկավար Մարկ Ցուկերբերգը:
Գործընկերոջ հետ համակարծիք է Լարի Փեյջը՝ Google ընկերությունից, ով հավելել է, որ օգտատերերի անձնական տվյալների անձեռնմխելիությունը գտնվում է սպառնալիքի տակ: Այս մասին տեղեկացնում է ITAR-TASS-ը:
