Ի՞նչն է փոխում բանակցային գործընթացում վարչապետի հայտարարությունն այն մասին, թե Հայաստանը չի պատրաստվում Արցախի փոխարեն բանակցել. «Առաջին լրատվական»- ի հետ զրույցում անդրադառնալով այս հարցին՝ քաղաքագետ, ՌԱՀՀԿ տնօրեն Մանվել Սարգսյանն ընդգծեց, որ նոր իրավիճակ է ստեղծվել. այդ հայտարարության արդյունքում Ադրբեջանում խառնաշփոթ է առաջացել: «Դա լուրջ հայտարարություն է, այն էլ երբ որ զուգահեռ ասվում է, որ Ադրբեջանը պետք է նախօրոք հայտարարի, որ կոնֆլիկտի լուծումը պետք է բավարարի հակամարտության բոլոր երեք կողմերին: Ադրբեջանի համար խնդիր է առաջացել՝ ինչ անել»,- նշեց քաղաքագետը՝ հավելելով, որ Հայաստանի իշխանությունը, եթե պետք է խոսի ՀՀ անունից, պարզ ու հստակ պետք է ասի, թե ինչի մասին է խոսելու Ադրբեջանի հետ:
Մ. Սարգսյանի դիտարկմամբ՝ «հակամարտության երեք կողմ» արտահայտությունը նորություն չէ, բայց 20 տարի շարունակ ՀՀ իշխանությունը հայտարարում է, որ ինքն է ներկայացնում երրորդ կողմին, հիմա հայտարարվում է, որ Հայաստանը չի ներկայացնելու երրորդ կողմին: «Հակամարտության կարգավորման հիմքը հաստատվել է միջազգայնորեն, և յուրաքանչյուր կողմ պետք է քննարկի այն հարցերը, որոնց համար պատասխանատվություն է կրում. ոչ ոք չի կարող Հայաստանին պարտադրել՝ քննարկել տարածքային, հումանիտար խնդիրներ, որոնք դուրս են իր սահմաններից»:
Քաղաքագետի խոսքով՝ Հայաստանը ռեսուրսները չի օգտագործել, եղել են լրջագույն բացթողումներ. ապրիլյան պատերազմից հետո Հայաստանի համար ստեղծվել էին քաղաքական, դիվանագիտական պայմաններ, բայց Հայաստանը չօգտվեց այդ հնարավորությունից. «Մենք չենք պնդել, որ Ադրբեջանի կողմից խախտվել է 94-95թթ-ի զինադադարի պայմանագրերը, պետք է դիմեինք ՄԱԿ»:
«Աննպատակ բանակցությունները կարող են հանգեցնել պատերազմի»,- ընդգծեց քաղաքագետը, հավելելով, որ նախկինում Ադրբեջանը Մոսկվայի միջոցով բազմաթիվ անգամներ ճնշում է գործադրել Հայաստանի վրա, բայց այժմ փոխվել է այս սխեման, Մոսկվայի միջոցով Հայաստանին ճնշելը բարդացել է, և Ադրբեջանը ձգտում է ուղիղ բանակցել Հայաստանի հետ՝ առանց Արցախի. «Ադրբեջանի համար կրակելը բարդացել է, Ալիևը հասկացել է, որ ամեն կրակոց աշխատելու է իրենց դեմ: Հայաստանը պետք է պարտադրի, որ այն հարցերը, որոնք չեն վերաբերում ՀՀ-ին, չեն քննարկվելու Ադրբեջանի հետ, և որ պետք է բանակցել Արցախի հետ»:
Մանրամասն՝ տեսանյութում:
